ԵՄ-ն պատժամիջոցներ է սահմանել ռուսական մի շարք բանկերի և Կարեն Շահնազարովի նկատմամբ

Եվրամիությունը Ռուսաստանի դեմ 18-րդ պատժամիջոցային փաթեթի շրջանակում սահմանափակումներ է սահմանել 18 ֆիզիկական անձանց, 41 ընկերության և 22 ռուսական բանկերի նկատմամբ։ Համապատասխան որոշումը հրապարակվել է ԵՄ պաշտոնական հանդեսում, փոխանցում է Meduza-ն։

Պատժամիջոցների տակ են հայտնվել, մասնավորապես, «Մոսֆիլմ» կինոստուդիայի գլխավոր տնօրեն Կարեն Շահնազարովը, Ռուսաստանի կողմից օկուպացված Ղրիմի մշակույթի նախարարի տեղակալ Օլգա Բուրովան, «ՖոսԱգրո» ընկերության բաժնետեր Տատյանա Լիտվինենկոն, ինչպես նաև Չինաստանի, Հնդկաստանի և Իրանի քաղաքացիներ։ Նրանց արգելվել է մուտք գործել ԵՄ տարածք, իսկ Եվրոպայում գտնվող նրանց ակտիվները սառեցվել են։

Բացի այդ, սահմանափակումներ են կիրառվել հետևյալ բանկերի՝ Т-Банк, Сургутнефтегазбанк, Яндекс-банк, Ozon-банк և մի շարք այլ վարկային կազմակերպությունների նկատմամբ։

Պատժամիջոցային ցուցակում ընդգրկվել է նաև 105 նավթատար։ Դրանց արգելվել է մուտք գործել ԵՄ նավահանգիստներ, իսկ եվրոպական ընկերություններին արգելվել է այդ նավթատարներին ծառայություններ մատուցել։

18-րդ պատժամիջոցային փաթեթով արգելվում են բոլոր գործարքները, որոնք կապված են «Հյուսիսային հոսք» և «Հյուսիսային հոսք-2» գազատարների հետ, ինչպես նաև Ռուսաստանի ուղիղ ներդրումների հիմնադրամի (ՌՈւՆՀ) և դրա «դուստր» կազմակերպությունների հետ։

Սահմանափակումների շրջանակում ռուսական նավթի գնի սահմանաչափը իջեցվել է՝ 60 դոլարից հասնելով 47,6 դոլարի մեկ բարելի դիմաց, ինչպես նաև ներդրվել է սահմանաչափի ավտոմատ փոփոխման մեխանիզմ։ Գնի սահմանաչափը կախված կլինի Ռուսաստանի նավթի շուկայի միջին գներից, իսկ փոփոխությունների վերահսկողությունը կիրականացնի Եվրահանձնաժողովը։

Եվրոպական դիվանագիտության ղեկավար Կայա Կալլասն այս պատժամիջոցային փաթեթը համարել է «ամենադաժաններից»։

«Մենք մեծացնում ենք ճնշումը Ռուսաստանի ռազմական արդյունաբերության վրա, չինական բանկերի նկատմամբ, որոնք օգնում են շրջանցել պատժամիջոցները, և արգելափակում ենք այն տեխնոլոգիաների արտահանումը, որոնք օգտագործվում են անօդաչուներում»,-ասել է Կալլասը՝ մեկնաբանելով սահմանափակումների 18-րդ փաթեթը։