ԵՄ-ն դյուրացնում է Շենգենյան գոտի մուտքը Թուրքիայի քաղաքացիների համար

Եվրամիությունը Շենգենյան վիզայի պարզեցված ընթացակարգ է սահմանել օրինական ճանապարհորդության պատմություն ունեցող Թուրքիայի քաղաքացիների համար՝ հնարավորություն տալով ստանալ երկարաժամկետ բազմակի մուտքի վիզա, գրում է Turkish Minute-ը։

Եվրահանձնաժողովը հայտարարել է, որ փոփոխությունները վերաբերում են Թուրքիայում բնակվող այն քաղաքացիներին, ովքեր նախկինում ստացել և օրինականորեն օգտագործել են կարճաժամկետ Շենգենյան վիզա։ Դիմորդներն այժմ կարող են ստանալ բազմակի մուտքի վիզա՝ սկսած երկրորդ դիմումի վեցամսյա վավերականությունից, որը կարող է երկարաձգվել մինչև մեկ, երեք և հինգ տարի՝ կախված իրենց ճանապարհորդության պատմությունից։

Թարմացված համակարգը ներառում է Շենգենյան գոտու 25 անդամ պետություններ, այդ թվում՝ Գերմանիան, Ֆրանսիան, Իտալիան և Իսպանիան, սակայն բացառում է մասնագիտական կատեգորիաները, ինչպիսիք են բեռնատարի վարորդները և Թուրքիայում բնակվող ոչ թուրք քաղաքացիները։

Հանձնաժողովի ուղեցույցների համաձայն՝ վերանայված կանոնները նպատակ ունեն խրախուսել «բարեխղճ» դիմորդներին, որոնք ներկայացնում են նվազագույն միգրացիոն և անվտանգության ռիսկեր, միաժամանակ, նվազեցնելով ԵՄ երկրների հյուպատոսությունների վարչական բեռը՝ վիզայի հարցումների աճի պայմաններում։

Թուրքիայի առևտրի նախարար Օմեր Բոլաթը ողջունել է այս քայլը՝ հավելելով, որ թուրքական իշխանությունները և Եվրոպական հանձնաժողովը կշարունակեն ջանքերը՝ ապահովելու ավելի լայն վիզային ազատականացում։

Թուրքիայում ԵՄ դեսպան Թոմաս Հանս Օսովսկին ասել է, որ նոր կանոնները կհեշտացնեն Թուրքիայի քաղաքացիների ճանապարհորդությունը, սակայն զգուշացրել, որ այդ միջոցառումը չի լուծում վիզային երկարատև խնդիրները։ Նա նշել է, որ Եվրոպական հանձնաժողովը պատրաստ է վերսկսել պաշտոնական բանակցությունները Թուրքիայի կառավարության հետ՝ վիզայի ազատականացման ճանապարհային քարտեզով պահանջվող մնացած վեց չափանիշներին հասնելու համար։

Թուրքիան ու ԵՄ-ն 2013 թվականի դեկտեմբերից ի վեր մասնակցում են վիզային ռեժիմի ազատականացման երկխոսությանը, որը սահմանում է 72 չափանիշ, որոնց Թուրքիան պետք է բավարարի։

Չնայած նոր բարեփոխումներին՝ Թուրքիայում Շենգենյան գործընթացի նկատմամբ լայնորեն տարածված դժգոհություն կա, որը պայմանավորված է վերջին տարիներին երկարատև ուշացումներով և մերժումների աճով։

ԵՄ վիճակագրության համաձայն՝ 2024 թվականին Թուրքիան Շենգենյան վիզայի դիմորդ երկրների շարքում զբաղեցրել է երկրորդ տեղը՝ ավելի քան 1.17 միլիոն դիմումով։ Հաստատվել է ավելի քան 1 միլիոն դիմում, իսկ մերժումների մակարդակը նվազել է մինչև 14.5%՝ 2023 թվականի 16.1%-ի համեմատ։

Թարգմանությունը՝ Էմմա Չոբանյանի