29.04.2026 | 10:12
Հայտնի է Արման Ծառուկյանի հաջորդ մրցակիցը RAF-ում
Բաքվի դատարանում Արցախի ղեկավարների շինծու գործերով կրկին «տուժողներն» են ցուցմունք տալիս
Քաղաքականություն
18.07.2025 | 17:00
Բաքվի զինվորական դատարանում ընթանում է Արցախի նախագահների ու տարբեր պաշտոնյաների նկատմամբ հարուցված շինծու գործերով հերթական դատական նիստը։
Ադրբեջանական լրատվամիջոցների փոխանցում են, որ դատական նիստին «տուժողներն» են ցուցմունք տալիս։ Մասնավորապես, «տուժող» Քերեմ Մամեդովն ասել է, թե ինքը 1990 թվականի մարտի 7-ին գերի է ընկել Հայաստանում։ Նա նշել է, որ գնացել է այդ տարածք ՈՒԱԶ մակնիշի մեքենայով՝ Զանգիլանի և Կապանի շրջանների միջև կապի գիծը վերականգնելու համար։ Նրան ուղեկցել են Բաղիրով Շաքիր Ավեզ օղլուն, Զանգիլանի շրջանի կապի կենտրոնի վարորդ Էմինը և պարետի հրամանատարը ևս Էմին անունով։
Երբ նրանք մալուխային գծերը ստուգելուց հետո մտել են Կապանի շրջանի կապի կենտրոն, իբր տուժողը և մյուս ադրբեջանցիները ծեծի են ենթարկվել կենտրոնի բակում հավաքված հայերի կողմից և պատանդ վերցվել։ Դրանից հետո Հայաստանի Կապանի շրջանի ՆԳ վարչության աշխատակիցները և այնտեղ ժամանած զինվորականները նրանց տարել են Կապանի շրջանի ՆԳ վարչություն: Այնտեղ իբր թե «քաղաքացիական հագուստով չորս հայեր տանջել են նրանց, ծեծել բռունցքներով և ոտքերով՝ պատճառելով տարբեր մարմնական վնասվածքներ: Արդյունքում Մամեդովը ստացել է աջ կողմի կողոսկրերի կոտրվածք, ամբողջ մարմնով կապտուկներ և գանգուղեղային վնասվածք: Բաղիրովը գլխուղեղի արյունազեղում է ստացել»։
Զանգիլանի շրջանից խորհրդային զինծառայողները նրանց, իբր, թե վերցրել են հայերից, նստեցրել զրահափոխադրիչի մեջ և տարել Զանգիլանի շրջան՝ ազատելով գերությունից։
Դատարանում դատախազի հարցին ի պատասխան՝ Մամեդովը նշել է, թե երկու ամիս բուժում է ստացել հիվանդանոցում՝ Հայաստանում ստացած վնասվածքների պատճառով։
Հիշեցնենք, որ նախօրեին տեղի ունեցած կրկին մի շարք «տուժողներ» էին ցուցմունքներ տվել։
Թարգմանությունը ՝ Էմմա Չոբանյանի
