«Ներս կթողնենք, օրենք չենք խախտելու»․ ՀԷՑ-ի տնօրենը՝ պետության կողմից նշանակվելիք կառավարչի մասին

Արդեն հայտնել ենք, որ Ռոմանոս Պետրոսյանն ազատվել է Պետական վերահսկողական ծառայության ղեկավարի պաշտոնից։ Տևական ժամանակ է՝ մամուլում տեղեկություններ են շրջանառվում, թե նա նշանակվելու է «Հայաստանի էլեկտրական ցանցեր» ՓԲԸ-ում պետական կառավարիչ։ Փորձեցինք այդ տեղեկությունը ճշտել Պետրոսյանից, սակայն նա հեռախոսազանգերին չպատասխանեց։

ՀԷՑ-ում պետական կառավարիչ նշանակելու հնարավորություն տվող օրենսդրական փոփոխությունը ԱԺ-ն իշխող ՔՊԿ-ի «կողմ» ձայներով ընդունեց այս ամսվա սկզբին, երբ ընկերության սեփականատեր Սամվել Կարապետյանը քննադատեց Նիկոլ Փաշինյանին՝ պնդելով, թե նա արշավ է սկսել եկեղեցու դեմ։

ՀԷՑ-ում պետական կառավարիչ նշանակելու լիազորությունը Հանրային ծառայությունները կարգավորող հանձնաժողովի նախագահին է օրենքով վերապահված։ Կառույցից ո՛չ թեկնածուի, ո՛չ նշանակման ժամկետների վերաբերյալ տեղեկություն չհայտնեցին։

ՀԷՑ-ի գլխավոր տնօրենի պաշտոնակատար Դավիթ Ղազինյանը Factor.am-ի հարցին ի պատասխան նշեց, որ ո՛չ կառավարությունից, ո՛չ հանձնաժողովից որևէ տեղեկություն չեն ստացել այն մասին, որ առաջիկայում ընկերությունում պետական կառավարիչ է նշանակվելու։ Հարցին՝ արյդո՞ք նման տեղեկություն ունեն, որ Ռոմանոս Պետրոսյանի թեկնածությունն է քննարկվում, Դավիթ Ղազինյանն ասաց՝ այնքանով, որքանով մամուլն է գրում այդ մասին։

Ստորև ներկայացնում ենք Ղազինյանի հետ մեր հարցպատասխանի սղագրությունը, 

-Լրագրող –  Իսկ ի՞նչ է անելու ՀԷՑ-ի ղեկավար կազմը, եթե որևէ մեկը նշանակվի պետական կառավարչի պաշտոնում։

-Ղազինյան – ՀԷՑ-ը իր բնականոն աշխատանքով աշխատելու է։

-Ներս թողնելո՞ւ եք պետական կառավարչին։

-Այո՛, իհարկե։ Այնպես չէ, որ օրենքը խախտելու ենք։ Օրենք է, հիմա ընդունել են, դրա հիման վրա գործողություններ են կատարվում։ Իհարկե, մենք դեմ ենք, բողոքարկումներ լինելու են, բայց չենք կարող արգելել մուտքը։

-Պետական կառավարչի նշանակումից հետո ո՞վ է լինելու գլխավոր տնօրենը։

-Ես օրենքից հասկացել եմ, որ կառավարիչ ասելով՝ նկատի ունեն գլխավոր տնօրեն։

Նշենք, որ Նիկոլ Փաշինյանը քիչ առաջ ֆեյուքյան էջում երեկ տեղի ունեցած չորս ու կես ժամանոց ասուլիսից առանձնացրել և տարածել էր ՀԷՑ-ին առնչվող հարցին իր պատասխանի տեսագրությունը։ «Պետությունը պետք է վերցնի ՀԷՑ-ի կառավարումը՝ հասկանալու, թե ինչ է տեղի ունեցել և տեղի ունենում այնտեղ», –  տեսանյութին կից գրել է Նիկոլ Փաշինյանը։

Նարեկ Կիրակոսյան