Պատասխանները մեզ չեն գոհացրել. ջերմոցատերը` ՍԱՏՄ ղեկավարի հետ հանդիպման մասին․ ՏԵՍԱՆՅՈՒԹ

Ծաղկի մշակությամբ և արտահանմամբ զբաղվող մի խումբ տնտեսվարողներ այսօր հանդիպում ունեցան Սննդի և անվտանգության տեսչական մարմնի ղեկավար Տիգրան Պետրոսյանի հետ։ Հանդիպումից հետո ջերմոցատեր Արտակ Թովմասյանը լրագրողների հետ զրույցում ասաց, որ կառույցը տնտեսվարողներին հուզող բոլոր հարցերը լսել է, պատասխաններ են տրվել, բայց ոչ բոլոր հարցերի պատասխաններն են իրենց գոհացնում։

«Ես հարցնում եմ, եթե մի մեքենայի մեջ մի քանի արտադրողի ծաղիկ է գնում, այդ ամբողջ խմբաքանակն է այրվելու, ասում են՝ այո»,- ասաց նա՝ հայտնելով, որ պայմանավորվածություն է ձեռք բերվել, որ ՍԱՏՄ-ից գնան, բոլորին ստուգեն։

Թովմասյանի գնահատմամբ՝ տեսչական մարմինը չի կարողանա բոլոր ջերմոցները կարճ ժամանակում ստուգել, իսկ մարդիկ այս պահին ծաղիկ են թափում։

«Հիմա ասում են, մենք ծաղիկը պիտի վերցնենք՝ տանենք ֆիտոսանիտարական ծառայություն՝ ստուգման։ Ես հարց եմ տալիս, ասում եմ, եթե իմ նույն ստուգված ծաղիկը Ռուսաստանը չի ուզում ընդունի, ենթադրենք, ասում է, որ ծաղիկի վրա կա թրիպս (հիվանդություն), մեր ֆիտոսանիտարն, իրենց ֆիտոսանիտարի հետ ո՞նց է կռվելու։ Հայաստանում ստուգում են, ասում են՝ նորմալ է, մտել են Ռուսաստան՝ նորմալ չի։ Պատասխան չստացանք այդ հարցին»,- ասաց ջերմոցատերը։

Անդրադառնալով երրորդ երկրներից ներմուծված ծաղկի արտահանման հարցին՝ Թովմասյանը նշեց՝ ռուսական կողմը կասկածում է, որ Հայաստանն այնքան ջերմոց ունի, որքան արտահանում է։

Մանրամասները՝ տեսանյութում։

Անի Թամրազյան