Ադրբեջանի և Թուրքիայի եղբայրությունն ու ռազմավարական դաշինքը անվտանգության կարևոր գործոն են․ Ալիևը՝ Էրդողանին

Ադրբեջանի նախագահ Իլհամ Ալիևը նամակ է հղել Թուրքիայի նախագահ Ռեջեփ Թայիփ Էրդողանին՝ 2016 թվականի հուլիսի 15-ին ձախողված հեղաշրջման փորձի 9-րդ տարելիցի կապակցությամբ։ Ալիևը նշել է, որ «հեղաշրջման փորձի առաջին իսկ պահերից ադրբեջանական ժողովուրդն ու պետությունը կանգնած են եղել եղբայրական Թուրքիայի կողքին՝ ցույց տալով իրենց աջակցությունն ու համերաշխությունը, և դա «Մեկ ազգ, երկու պետություն» սկզբունքի ևս մեկ դրսևորում էր, եղբայրության վառ օրինակ»։

«Դուք այժմ վճռականությամբ և համառությամբ աշխատում եք «Թուրքիա առանց ահաբեկչության» նպատակին հասնելու համար՝ ապագա սերունդներին որպես ժառանգություն թողնելով անվտանգ, խաղաղ և բարգավաճ երկիր։ Քուրդիստանի  աշխատավորական կուսակցություն (PKK) ահաբեկչական խմբավորման վերջերս կայացրած որոշումը՝ լուծարվելու և զենքերը վայր դնելու մասին, ձեր ուժեղ քաղաքական կամքի փայլուն արդյունք էր, ազգային միասնության և համերաշխության հաղթանակ»,- նշել է Ադրբեջանի նախագահը։

Նա հավելել է, որ երկու երկրները «շարժվում են դեպի ապագա ուս ուսի տված»։

«Այսօր Ադրբեջանն ու Թուրքիան վստահ և հաջողությամբ շարժվում են դեպի ապագա՝ ուս ուսի տված։ Մեր երկրների անսասան եղբայրությունը, աշխարհում համարժեքը չունեցող միասնությունն ու ռազմավարական դաշինքը կարևոր գործոն են ինչպես մեր տարածաշրջանի, այնպես էլ ամբողջ աշխարհի անվտանգության, գործընկերության և զարգացման համար։ Ես վստահ եմ, որ մեր ռազմավարական դաշինքը, որը հիմնված է երկու եղբայրական ժողովուրդների կամքի վրա, որոնք պատմականորեն աջակցում են միմյանց, ինչպես նաև Շուշիի հռչակագրի վրա, կշարունակի ամրապնդվել և խորանալ համատեղ ջանքերով»,- ասվում է Ալիևի նամակում։

Թարգմանությունը՝ Էմմա Չոբանյանի