30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Ռուսական զորքերը ԱԹՍ-ներով ու հրթիռներով հարվածել են Կիևին․ զոհվել է 2 մարդ, ևս 16-ը՝ վիրավորվել
Քաղաքականություն
10.07.2025 | 10:41
Ռուսական զորքերը լույս հուլիսի 10-ի գիշերը անօդաչու թռչող սարքերով ու բալիստիկ հրթիռներով հարվածներ են հասցրել Ուկրաինային։ Կիևում 2 կին է զոհվել, վիրավորվել՝ 16 մարդ։ Այս մասին հայտնում են տեղական իշխանությունները։
Ուկրաինայի ՆԳՆ ղեկավար Իգոր Կլիմենկոն հայտնել է, որ Կիևի 8 շրջանում գիշերային հարվածի հետևանքով վնասվել են բնակելի, բժշկական, կրթական, առևտրային և տրանսպորտային ենթակառուցվածքները։ Նա նշել է, որ մայրաքաղաքի Պոդոլսկի շրջանում զոհվել է երկու կին. Կիևի 68-ամյա բնակիչուհի և 22-ամյա ոստիկանության կապրալ, մետրոյի ոստիկանության աշխատակցուհին։
«Տասից ավելի մարդ վիրավորվել է։ Եվ, ցավոք, զոհերի թիվը կաճի։ Մարդիկ շարունակում են բժշկական օգնություն խնդրել», – գրել է Կլիմենկոն։
Կիևի քաղաքապետ Վիտալի Կլիչկոն հայտնել է, որ հարձակման հետևանքով Շևչենկովսկի շրջանի բնակելի շենքի վերին հարկում հրդեհ է բռնկվել, իսկ մի քանի այլ հասցեներում գրանցվել են բեկորների անկումներ։
«Մինչ այժմ մայրաքաղաքում թշնամու կողմից իրականացված զանգվածային հարձակման հետևանքով կա 16 տուժած։ Բժիշկները հոսպիտալացրել են նրանցից 10-ին, իսկ մյուսներին օգնություն են ցուցաբերել տեղում կամ ամբուլատոր պայմաններում»,-գրել է Կլիչկոն տելեգրամի իր ալիքում։
Ուկրաինայի պետական արտակարգ իրավիճակների ծառայության մոտ 400 փրկարար և 90 միավոր հրշեջ-փրկարարական, ինժեներական և ռոբոտացված տեխնիկա է ներգրավված փլատակների մաքրման և հարվածների հետևանքների վերացման գործում:
Թարգմանությունը՝ Էմմա Չոբանյանի
