Ի՞նչ կկորցնի Հայաստանը, եթե ՀԱՊԿ ԽՎ-ն Երևանից տեղափոխվի Մոսկվա․ կարծիքներ

ՀԱՊԿ Խորհրդարանական վեհաժողովի նիստը Երևանից կտեղափոխվի Մոսկվա: Այս մասին հայտարարել է Պետդումայի ԱՊՀ, Եվրասիական ինտեգրացիայի և հայրենակիցների հետ կապերի հարցերով հանձնաժողովի ղեկավար Լեոնիդ Կալաշնիկովը՝  հավելելով, որ այդ որոշումը պայմանավորված է Հայաստանի վարչապետ Նիկոլ Փաշինյանի հնարավոր հրաժարականով:

Արտակարգ և լիազոր դեսպան Արման Նավասարդյանը Factor.am-ի հետ զրույցում անդրադառնալով այս հայտարարությանը` նշեց, որ այդ վեհաժողովը Երևանից Մոսկվա տեղափոխելը որևէ բեկումնային փոփոխություն չի կարող առաջացնել, իսկ այդ որոշումն էլ օբյեկտիվորեն պայմանավորված է այն հանգամանքով, որ հոկտեմբերի վերջին, եթե ՀՀ վարչապետ Նիկոլ Փաշինյանը հրաժարական տա, խորհրդարանը կլինի լուծարված։

«Չեմ կարծում, որ որևէ մեկը շահագրգռաված է լինելու այդ վեհաժողովում Հայաստանի դեմ ինչ-որ խնդիրներ քննարկել։ Կարծում եմ՝ Մոսկվայում կքննարկվի ՀԱՊԿ գլխավոր քարտուղար Յուրի Խաչատուրովի հարցը և պնդում եմ, որ Հայաստանը պետք է վճռական հանդես գա ՀԱՊԿ անդամ որոշ պետությունների՝ Բելառուսիայի և Ղազախստանի վարած քաղաքականության դեմ։ Ուզում եմ նաև նշել, որ Նիկոլ Փաշինյանի՝ իշխանության գալով ՀԱՊԿ անդամ պետություններից Ղազախստանում որոշակի հայանպաստ գործընթացներ են  տեղի ունենում և կարծում եմ՝ հեղափոխությունն իր ազդեցությունն  ունենում է նաև արտաքին քաղաքականության վրա»,-ասաց Արման Նավասարդյանը։

Անդրադառնալով Կալաշնիկովի այն արտահայտությանն, ըստ որի, Հայաստանի խորհրդարանը կլուծարվի և անկայուն վիճակ կարող է ստեղծվել հոկտեմբերի վերջին, Արման Նավասարդյանը նկատեց․

«Կալաշնիկովի մակարդակի ասված հայտարարությունը չի կարելի ընդունել որպես ՌՌ պետական մակարդակով արված հայտարարություն, մենք արդեն սովորել ենք նման հայտարարութունների։ Այստեղ ամենակարևոր փաստն այն է, որ հեղափոխությունն անշրջելի գործընթաց է»:

ՀԱՊԿ ԽՎ նիստը Երևանից Մոսկվա տեղափոխելն անկարևոր բան է համարում Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը, քանի որ խորհրդարանական վեհաժողովն, ըստ նրա, ունի  0 ճանաչում։

«Նրանք նիստը կտեղափոխեն, թե ոչ, որևէ բան չի նշանակում, քանի որ կազմակերպությունը պետք լինի ճանաչված,  իսկ ՀԱՊԿ ԽՎ-ն ընդհանրապես ճանաչված չէ, 0 ճանաչում ունի, այնպես որ, եթե նման հայտարարություն աներ լուրջ  կառույց, կարող էինք այն դնել և քննարկել»,-Factor.am-ի հետ զրույցում ասաց Գրիգորյանը։

Քաղաքագետը նաև նշեց`քանի որ Հայաստանի խորհրդարանը հոկտեմբերի վերջին արդեն լուծարված է լինելու, ուստի Հայաստանի մասնակցությունն այդ վեհաժողովին անիմաստ է լինելու։

«Խորհրդարանն արձակված է լինելու, հիմա ի՞նչ լիազորություններ են ունենալու մեր պատգամավորները, որ գնան և մեր անունից այդ համաժողովին մասնակցեն։ Հետևաբար, թող չգնան և չմասնակցեն, որևէ էական բան դրանից բաց չենք թողնելու»,-ասաց նա։

Հիշեցնենք, որ, ըստ Լեոնիդ Կալաշնիկովի տարածած հայտարարության՝ «ըստ ամենայնի, Հայաստանի խորհրդարանն այդ ժամանակ կլուծարվի, այդ անկայուն վիճակը կարող է ստեղծվել հոկտեմբերի վերջին: Եթե իրավիճակը մեր պատկերացրած սցենարով զարգանա, մենք ո՞ւմ հետ ենք Խորհրդարանական վեհաժողով անցկացնելու: Պաշտոնակատարների՞: Դա սխալ է և անտրամաբանական», – մեկնաբանել է Կալաշնիկովը՝ կարծիք հայտնելով, որ ՀԱՊԿ ԽՎ-ն «կարելի է հանգիստ անցկացնել Մոսկվայում»: – «Իսկ երբ Հայաստանում ամեն ինչ հունի մեջ կընկնի, մենք կաշխատենք գործող պատգամավորների և գործող վարչապետի հետ»:

Հավելենք նաև, որ ՀԱՊԿ խորհրդարանական վեհաժողովի 2018 թվականի նիստը Երևանում  հոկտեմբերի 29-30-ին անցկացնելու որոշումն ընդունվեց 2018 թվականի ապրիլին Սանկտ Պետերբուրգում անցկացված հերթական նիստի ընթացքում։