09.06.2026 | 00:17
Մարկո Ռուբիոն շնորհավորել է Փաշինյանին
Տավուշի մարզպետը Ազատամուտի համայնքապետից մերժում է ստացել, բանակցություններն ավարտվել են անարդյունք
16.10.2018 | 16:24
Այսօր վաղ առավոտից Հայաստան-Վրաստան միջպետական ավտոճանապարհը փակած Տավուշի մարզի Ազատամուտ համայնքի բնակիչներին հանդիպել է Տավուշի մարզպետ Վահե Ղալումյանը։
Factor.am-ի հետ զրույցում Տավուշի մարզպետը նշեց, որ թեև առավոտից Ազատամուտ համայնքի բնակիչների հետ հանդիպումներ է ունեցել, փորձել նրանց հասկացնել, որ միջպետական ճանապարհ փակելով հարց լուծել հնարավոր չէ, սակայն ապարդյուն, համայնքի բնակիչներն անդրդվելի են և շարունակում են պահանջել Ազատամուտի համայնքապետ Ժորա Մարտիրոսյանի հրաժարականը։
«Մեկ օրվա մեջ Ազատամուտի 1200 հոգանոց համայնքում հավաքվել է 900 ստորագրություն՝ Ժորա Մարտիրոսյանի հրաժարականի պահանջով, Մարտիրոսյանն էլ պնդում է, որ կատարվողն իր դեմ կազմակերպված արշավ է և չի պատրաստվում հեռանալ։ Այսօր Ժորա Մարտիրոսյանին առաջարկեցի հրաժարվել պաշտոնից և կազմակերպել նոր ընտրություններ իր մասնակցությամբ, սակայն կրկին մնաց անդրդվելի և մերժեց հաշտության եզրեր գտնելու այդ տարբերակը»,- ասաց Տավուշի մարզպետը։
Վերջինս նաև նշեց, որ ազատամուտցիները խնդրել են կազմակերպել իրենց հանդիպումը Պետական վերահսկողական ծառայության ղեկավար Դավիթ Սանասարյանի հետ, ինչն էլ այժմ փորձում է իրականացնել։
Աղավնի Սուքիասյան
