Բաքվի դատարանում «տուժողն» իր ցուցմունքում խոսել է Ռոբերտ Քոչարյանի մասին

Բաքվի զինվորական դատարանում Արցախի ղեկավարների և այլ պաշտոնյաների՝ ընդհանուր 15 անձի նկատմամբ հարուցված շինծու գործերով հերթական դատական նիստում, այսպես կոչված, «տուժողներ» են ցուցմունք տվել։ Ադրբեջանական լրատվամիջոցների փոխանցմամբ, իբր, Կրկժանի բնակիչ Դարգյահ Հախվերդիևը հայտարարել է, որ 1987 թվականից ի վեր Ստեփանակերտում բնակվող «հայազգի մարդկանց կողմից ազգային խտրականության հիման վրա ճնշում է գործադրվել  ադրբեջանական բնակչության վրա»։ Նա ասել է, թե ՀՀ երկրորդ նախագահ Ռոբերտ Քոչարյանն այդ ժամանակ ակտիվորեն մասնակցել է այդ գործընթացներին։

Նա հայտարարել է, թե «1988 թվականի փետրվարից հետո հայերը սկսել են բացահայտորեն վտարել ադրբեջանցիներին, նույն թվականի սեպտեմբերին հրդեհվել են Ստեփանակերտում ապրող ադրբեջանցիների տները»։ Այսպես կոչված, «տուժողը» պնդել է, թե այդ ժամանակ քաղաքի կենտրոնական հրապարակում հայերի կողմից անցկացված հանրահավաքից հետո զինված հայերը, իբր, հարձակվել են Կրկժան գյուղի վրա և այրել  մի քանի տուն։ Ըստ նրա՝ «1991 թվականից ի վեր գյուղը ենթարկվել է Ստեփանակերտում տեղակայված 366-րդ մոտոհրաձգային գնդում ծառայող հայ զինվորների կողմից հրետակոծության՝ օգտագործելով այդ գնդի զենքերն ու սարքավորումները։ Դեկտեմբերի 28-ին գյուղի վրա  հարձակված հայերը գրավել են  այն ու իբր այրել ադրբեջանցիներին պատկանող բոլոր տները»։

«Ներխուժումից առաջ նրանք զանգահարում և վիրավորում էին մեզ՝ ասելով. «Դուրս եկեք, գնացեք, Ղարաբաղը պետք է միացվի Հայաստանին, այստեղ պետք է ապրեն միայն հայերը»։ Երբ նրանք հարձակվեցին, բղավում էին՝ «Ադրբեջանցիները պետք է հեռանան, սա հայկական տարածք է»»,- ասել է «տուժողը»։

Նա նշել է, թե, իբր, «օկուպացիայի ժամանակ բնակչությունը գյուղից դուրս է եկել անտառի միջով և մեծ դժվարությամբ հասել Շուշի»:

Հիշեցնենք, որ հուլիսի 4-ին տեղի ունեցած նախորդ դատական նիստում ցուցմունքներ էին տվել, իբր, «Հայաստանի կողմից նախկինում օկուպացված Ադրբեջանի տարածքներում գերի և պատանդ վերցված, ինչպես նաև հայ զինծառայողների կողմից արձակված կրակոցների հետևանքով վիրավորված և այլ վնասվածքներ ստացած անձինք»։

Թարգմանությունը՝ Էմմա Չոբանյանի