Բաքվի դատարանում կրկին, իբր, հայերի կողմից գերեվարված ադրբեջանցիներ են ցուցմունքներ տվել

Արցախի նախկին նախագահների ու այլ պաշտոնյաների նկատմամբ հարուցված շինծու քրեական գործերով դատական նիստ է Բաքվի զինվորական դատարանում տեղի է ունեցել։ Այն նախագահել է դատավոր Զեյնալ Աղաևը։

Ադրբեջանական լրատվամիջոցների հաղորդմամբ` դատավարության ընթացքում ցուցմունքներ են տվել, իբրև թե, «Հայաստանի կողմից նախկինում օկուպացված Ադրբեջանի տարածքներում գերի և պատանդ վերցված անձինք, ինչպես նաև հայ զինծառայողների կողմից արձակված կրակոցների հետևանքով վիրավորված և այլ վնասվածքներ ստացած անձինք»։

«Տուժողներից» Բախտիյար Մագոմեդ օղլու Գուլիևը իր ցուցմունքում նշել է, թե «1993 թվականի մարտի 31-ին Քարվաճառի շրջանի օկուպացիայի կապակցությամբ նրա, իր ընտանիքի անդամների և այլ քաղաքացիական անձանց վրա կրակ են բացել հայկական Զինված ուժերը՝  «Թունել» կոչվող տարածքը լքելիս» ։

Արդյունքում մահացել է նրա եղբայրը՝ Իսլամ Գուլիևը։ Նա վիրավորվել է ձախ ազդրից։ Հայ զինվորները նրանց, իբր, պատանդ են վերցրել և սկզբում տարել Մարտակերտի շրջան, ապա՝ Ստեփանակերտ։ Նշվում է, թե պատանդ եղած ժամանակ նրանց խոշտանգել են։

«Ես վիրավոր էի, երբ ինձ պատանդ վերցրին։ Նրանք սառը ջուր լցրին վերքիս վրա՝ արյունահոսությունը դադարեցնելու համար։ Ես 7 ամիս պատանդ էի։ Նրանք մեզ հետ անմարդկային էին վարվում»,- ասել է նա։

«Տուժողը» գերությունից ազատ է արձակվել 1993 թվականի սեպտեմբերի 22-ին և փոխանցվել ադրբեջանական կողմին։

Պետական մեղադրող Ֆուադ Մուսաևի հարցերին ի պատասխան՝ նա նշել է, թե, իբր, «Քարվաճառի օկուպացիայի ժամանակ իրեն միջանցք չի տրամադրվել տարածքը լքելու համար»։

Տարբեր «տուժողներ» են ցուցմունքներ տվել, շատերը կապված Քարվաճառի գրավման իրադարձությունների հետ։

Հաջորդ դատական նիստը տեղի կունենա հուլիսի 7-ին։

Հավելենք, որ նախօրեի նիստում կրկին «հայկական ուժերի կողմից գերեվարված ադրբեջանցիներն էին ցուցմունքներ տվել»։

Թարգմանությունը` Էմմա Չոբանյանի