Իրանի գերագույն առաջնորդն առաջին անգամ հայտնվել է հանրության առաջ Իսրայելի հետ պատերազմի սկսվելուց հետո

Իրանի գերագույն առաջնորդ այաթոլլա Ալի Խամենեին հուլիսի 5-ին Թեհրանում մասնակցել է Աշուրայի առթիվ կազմակերպված կրոնական արարողությանը։ Աշուրան շիա մուսուլմանների օրացույցի ամենակարևոր օրն է։ Իրանական հեռուստատեսությունը ցուցադրել է Խամենեիի տեսագրությունները, հաղորդում է Reuters-ը։

Ալի Խամենեին առաջին անգամ հրապարակային կերպով հայտնվել է հունիսի 13-ից հետո, երբ Իսրայելը պատերազմ է սկսել Իրանի դեմ։ 12 օր տևած պատերազմի ընթացքում, որի հետևանքով զոհվել են բարձր պաշտոն ունեցող իրանցի հրամանատարներ և միջուկային գիտնականներ, Խամենեին գտնվել է «ապահով վայրում»։ Bild պարբերականը, հղում անելով փորձագետներին, գրել էր, որ նա եղել է իր բունկերում։

Անվտանգության նկատառումներով պատերազմի ընթացքում Խամենեին հրապարակում էր նախապես ձայնագրված տեսաուղերձներ և խուսափում էր հրապարակային ելույթներից։

Հիշեցնենք՝ հունիսի 13-ից Իսրայելը հարվածներ էր հասցնում Իրանի տարածքին՝ թիրախավորելով միջուկային օբյեկտներ, բարձրաստիճան զինվորականների և գիտնականների։ Ի պատասխան՝ Իրանը հրթիռներ և անօդաչու թռչող սարքեր էր արձակում Իսրայելի ուղղությամբ։

Ամերիկայի Միացյալ Նահանգները ներգրավվել էր հակամարտության մեջ հունիսի 22-ին և հարվածել երեք իրանական միջուկային օբյեկտների։ Երկու օր անց Իրանը՝ նախապես նախազգուշացնելով, հարված էր հասցրել Կատարում գտնվող ամերիկյան ռազմաբազային։

Հունիսի 24-ին Իսրայելը և Իրանը պայմանավորվել էին դադարեցնել կրակը։ Հունիսի 26-ին հրապարակված տեսաուղերձում Ալի Խամենեին հայտարարել էր, որ Իրանը հաղթել է Իսրայելին և ԱՄՆ-ին։ Դրանից հետո ԱՄՆ նախագահ Դոնալդ Թրամփը հայտարարել էր, թե ինքը փրկել է Իրանի գերագույն առաջնորդին «խայտառակ մահից»։