ՀՀ ԱԺ պատվիրակությունը մասնակցում է Պորտուգալիայում ընթացքղ ԵԱՀԿ ԽՎ տարեկան 32-րդ նստաշրջանի աշխատանքներին: ԱԺ-ից հայտնում են, որ պատվիրակության անդամ, արտաքին հարաբերությունների մշտական հանձնաժողովի նախագահ Սարգիս Խանդանյանը ելույթ է ունեցել նստաշրջանի լիագումար նիստում:
Ելույթի սղագրությունը՝ ստորև․
«Տիկի՛ն նախագահ,
Հելսինկյան եզրափակիչ ակտի հիմնասյուներից մեկը մասնակից պետությունների միջեւ համագործակցության հանձնառությունն է: Այն հռչակում է «Պետությունները կնպաստեն բարիդրացիական հարաբերությունների զարգացմանը, կձգտեն ամրապնդել ու երկարաժամկետ հիմքերի վրա կառուցել հարաբերություններ՝ ի շահ ժողովուրդների»:
Այս փաստաթղթի ընդունումից 50 տարի անց, ցավոք, մենք դեռեւս չենք հասել այդ նպատակին:
Հայաստանն իր հարեւան՝ ԵԱՀԿ անդամ երեք պետություններից միայն մեկի՝ Վրաստանի հետ ունի բաց սահմաններ եւ դինամիկ համագործակցություն: Մենք գնահատում եւ խորապես արժեւորում ենք այս բարեկամական ու ռազմավարական հարաբերությունները, որոնք հիմնված են ընդհանուր շահերի, արժեքների եւ փոխվստահության վրա:
Հայաստանի ժողովուրդը ձգտում է ունենալ կարգավորված հարաբերություններ եւ համագործակցություն նաեւ մյուս երկու հարեւանների հետ: Հայաստան-Ադրբեջան խաղաղությունը հեռավոր հույս չէ, այլ՝ հասանելի իրողություն: Մեր երկու երկրները համաձայնել են խաղաղության պայմանագրի տեքստի շուրջ, եւ Հայաստանը պատրաստ է այն ստորագրել անմիջապես: Մենք սպասելու ժամանակ չունենք, պետք է գործել արագ՝ Հելսինկյան եզրափակիչ ակտի ոգով եւ հանուն մեր ժողովուրդների բարօրության:
Հայաստանի ժողովուրդը ցանկանում է նաեւ ունենալ կարգավորված հարաբերություններ եւ բաց սահման Թուրքիայի հետ: Ես հավատում եմ, որ երկու երկրների առաջնորդները զգալի առաջընթաց են գրանցել այդ ուղղությամբ: Մենք այժմ ունենք ակտիվ քաղաքական երկխոսություն: Հայաստանի վարչապետի պատմական այցը Ստամբուլ եւ հանդիպումը Թուրքիայի նախագահի հետ քայլ էր վստահության կառուցման ու կարգավորման երկար սպասված պահը մոտեցնելու նպատակով: Այս հարցում եւս մենք չենք կարող ժամանակ կորցնել, եւ ամենակարեւորը՝ չկան անհաղթահարելի խոչընդոտներ:
Մենք բոլորս գիտենք, որ ոչ միայն մեր տարածաշրջանի ժողովուրդներն են շահելու բաց սահմաններից, գործող տրանսպորտային կապերից եւ տնտեսական համագործակցությունից, այլեւ ամբողջ ԵԱՀԿ տարածաշրջանը: Խաղաղ եւ կապակցված Հարավային Կովկասը՝ խաղաղության խաչմերուկը, կարող է ծառայել որպես կենսական կամուրջ՝ Կենտրոնական Ասիան Եվրոպային եւ դրանից անդին կապելու համար:
Շնորհակալություն»:
