«Սասնա ծռեր»  խմբի գործողությունն ընդամենը մեկ օգուտ տվեց. Արմեն Մարտիրոսյանը՝ ՊՊԾ գնդի գրավումից մեկ տարի անց

«Սասնա ծռեր» խմբիանդամների կողմից ներկայացված հիմնական պահանջներն այդպես էլ չկատարվեցին: Այս մասին Factor.am-ի հետ զրույցում հայտարարեց «Ժառանգություն» կուսակցության փոխնախագահ Արմեն Մարտիրոսյանը՝ անդրադառնալով ուղիղ մեկ տարի առաջ խմբի կողմից իրականացված գործողությանն ու դրա արդյունքներին:

«Առաջինը Հայաստանի ինքնիշխանության հարցն է, երկրորդը՝ քաղբանտարկյալների խնդիրը, արդար ընտրական համակարգ, ժողովրդի վստահության կառավարություն, Արցախի խնդրի հայանպաստ լուծում և այլն: Այս ամեն ինչը չի լուծվել, հակառակը՝ ավելի է խորացել»,- մեզ հետ զրույցում նշեց Արմեն Մարտիրոսյանը:

Ընդդիմադիր գործչի խոսքով՝ «Սասնա ծռեր»  խմբի գործողությունն ընդամենը մեկ օգուտ տվեց: «Առժամանակ հողերի հանձնման մոտեցումը հետաձգվեց կամ մի փոքր կոշտացավ իշխանությունների կողմից, որովհետև հիշում ենք՝ կոնկրետ Լավրովի պլանն էր առաջ մղվում, իսկ այդ գործողության արդյունքում Լավրովի պլանը չեզոքացվեց: Ճիշտ է՝ հիմա էլ  լավագույն վիճակը չէ մեզ մոտ, բայց ցանկացած պարագայում գոնե այդ ծայրահեղ մոտեցումը չեզոքացվեց»,- հավելեց «Ժառանգության» փոխնախագահը:

Հիշեցնենք՝ ուղիղ մեկ տարի առաջ այս օրը իրենց «Սասնա ծռեր» կոչող խմբի զինյալները գրավեցին Ոստիկանության պարեկապահակետային ծառայության գունդը՝ պատանդ պահելով ոստիկանների: Խմբի անդամների հիմնական պահանջներն էին. նախագահ Սերժ Սարգսյանի հրաժարականը, քաղաքական բանտարկյալների ազատ արձակումը,  ազատագրված տարածքների հանձնման բացառումը, անցումային կառավարության ձևավորումը:

Չնայած ներկայացված պահանջներից որևէ մեկը չկատարվեց, այնուամենայնիվ գնդի գրավումից  երկու  շաբաթ անց՝ հուլիսի 31-ին, խմբի ավելի քան 3 տասնյակ անդամները հանձնվեցին իրավապահ մարմիններին:

Մանրամասները՝ տեսանյութում:

Շողիկ Գալստյան