09.10.2026 | 20:52
Էդուարդ Սպերցյանը գոլային փոխանցում է կատարել «Ալ Ահլիի» կազմում. ՏԵՍԱՆՅՈՒԹ
Թրամփը հայտնել է, որ Իսրայելը համաձայնել է Գազայում 60-օրյա հրադադարի պայմաններին
Քաղաքականություն
02.07.2025 | 10:33
ԱՄՆ նախագահ Դոնալդ Թրամփը հայտարարել է, որ Իսրայելը համաձայնել է Գազայում 60-օրյա հրադադարի պայմաններին։ Այս մասին նա գրել է Truth Social սոցիալական ցանցում։
«Իմ ներկայացուցիչները երկար և արդյունավետ հանդիպում են ունեցել իսրայելցիների հետ Գազայի հարցով: Իսրայելը համաձայնել է 60-օրյա հրադադարի վերջնականացման համար անհրաժեշտ պայմաններին, որի ընթացքում մենք կաշխատենք բոլոր կողմերի հետ՝ պատերազմը դադարեցնելու համար։ Կատարցիներն ու եգիպտոսցիները, որոնք շատ են աշխատել խաղաղության հասնելու համար, կներկայացնեն այս վերջնական առաջարկը։ Հուսով եմ, որ Մերձավոր Արևելքի բարօրության համար ՀԱՄԱՍ-ը կընդունի այս գործարքը, քանի որ այն չի բարելավվելու, այլ միան վատանալու է»,- նշել է Թրամփը։
ԱՄՆ նախագահի այս հայտարարությունը հնչում է Իսրայելի վարչապետ Բենիամին Նեթանյահուի հետ Սպիտակ տանը հուլիսի 7-ին նախատեսված հանդիպումից առաջ։ Մինչ այդ, հունիսի 30-ին Իսրայելի ռազմավարական պլանավորման նախարար Ռոն Դերմերը մեկնել էր Վաշինգտոն՝ Գազայի հատվածում տիրող իրավիճակը և Իսրայելի վարչապետի այցը քննարկելու համար։
Իսրայելը և ՀԱՄԱՍ-ը հրադադարի նախորդ համաձայնությունը կնքել էին 2025 թվականի հունվարի 19-ին։ Այն նախատեսում էր երեք փուլ։ Առաջին փուլով ՀԱՄԱՍ-ն ազատ արձակեց 33 իսրայելցի պատանդի, իսկ Իսրայելը՝ գրեթե 2000 պաղեստինցի բանտարկյալի։ Բացի այդ, իսրայելական բանակը պետք է աստիճանաբար լքեր Գազայի հատվածի խիտ բնակեցված տարածքները։ Կողմերն առաջին փուլից այն կողմ չանցան։ Մարտին Իսրայելը վերսկսեց հարվածները Գազայի վրա։ Նեթանյահուի գրասենյակը հայտարարեց, թե ՀԱՄԱՍ-ը «մերժել է Մերձավոր Արևելքում ԱՄՆ հատուկ դեսպան Սթիվ Ուիթկոֆի բոլոր առաջարկները»։
Մայիսին ՀԱՄԱՍ-ն արձագանքեց ԱՄՆ-ի 60-օրյա հրադադարի պայմաններին՝ առաջ քաշելով իր սեփական պայմանները, այդ թվում՝ մշտական հրադադար և Իսրայելի լիակատար դուրսբերում Գազայից։
Սթիվ Ուիթկոֆը հայտարարեց, որ այդ պայմաններն անընդունելի են և հետ են մղում բանակցային գործընթացը։
Թարգմանությունը՝ Էմմա Չոբանյանի
