Մոսկվայի հետ հարաբերությունների լարվածության ֆոնին Ադրբեջանը պատրաստվում է փակել բոլոր ռուսալեզու դպրոցները

Բաքվի և Մոսկվայի միջև հարաբերությունների լարվածության ֆոնին Ադրբեջանում տեղեկություններ են շրջանառվում, որ ռուսալեզու դպրոցները փակվելու են։ Տեղական լրատվամիջոցների հաղորդմամբ՝ ծնողները հայտնում են, որ ծանուցումներ են ստացել WhatsApp մեսենջերի խմբերում։

Oxu.Az-ի տեղեկատվության համաձայն՝ ռուսալեզու դպրոցները փուլ առ փուլ են փակվելու։ Նշվում է, որ այս որոշումը նպատակ ունի ամրապնդել ադրբեջաներենի դիրքերը որպես կրթության հիմնական լեզու և ինտեգրել բոլոր քաղաքացիներին միասնական կրթական միջավայրում։

Հաղորդվում է, որ բարեփոխումները կիրականացվեն փուլ առ փուլ։ Առաջիկա երեք տարիների ընթացքում ռուսալեզու դպրոցները կանցնեն ադրբեջաներենով ուսուցման, իսկ ուսուցիչների համար կկազմակերպվեն վերապատրաստման դասընթացներ։

Հիշեցնենք, որ Բաքվի և Մոսկվայի հարաբերություններում նոր լարվածությունն առաջացել է ՌԴ ուժայինների կողմից Եկատերինբուրգում ադրբեջանցիների ձերբակալության ու մահվան դեպքերի պատճառով։

Ադրբեջանում այսօր հրապարակվել է ռուսական իրավապահ մարմինների գործողությունների արդյունքում սպանված ադրբեջանցի եղբայրներ Զիյադդին և Հուսեյն Սաֆարովների մարմինների դատաբժշկական փորձաքննության եզրակացությունը։ Ըստ ադրբեջանական կողմի՝ փորձաքննությունը հաստատել է, որ Զիյադդին և Հուսեյն Սաֆարովները ենթարկվել են դաժան խոշտանգումների, նրանց մարմինների վրա հայտնաբերվել են բազմաթիվ վնասվածքներ։

Ադրբեջանի գլխավոր դատախազությունն էլ հայտնում է, որ հարուցվել է քրեական գործ՝ ՌԴ-ում Ադրբեջանի քաղաքացիների և ադրբեջանական ծագում ունեցող անձանց նկատմամբ խոշտանգումների և առանձնակի դաժանությամբ դիտավորյալ սպանության փաստի առթիվ։

Թարգմանությունը՝ Էմմա Չոբանյանի