12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Թուրքիայի իշխանություններն Իզմիրում 120 մարդու են ձերբակալել, այդ թվում՝ ընդդիմադիր կուսակցության բարձրաստիճան պաշտոնյաների
Քաղաքականություն
01.07.2025 | 18:33
Թուրքական Իզմիրի գլխավոր դատախազության կողմից կոռուպցիայի և անօրինականությունների հետաքննության շրջանակում այսօր առավոտյան գործողություն է իրականացվել Իզմիրի քաղաքապետարանում։
Կոռուպցիոն հետաքննության շրջանակում ձերբակալվել է, ընդհանուր առմամբ, 120 մարդ, այդ թվում՝ Իզմիրի նախկին քաղաքապետ Թունչ Սոյերը և գլխավոր ընդդիմադիր Ժողովրդահանրապետական կուսակցության (CHP) մի քանի բարձրաստիճան պաշտոնյաներ։ Այս մասին X-ում գրել է Թուրքիայի երրորդ խոշորագույն քաղաքը տարիներ շարունակ ղեկավարող CHP-ի փոխնախագահ Մուրատ Բաքանը։
Ձերբակալությունները տեղի են ունենում ընդդիմության կողմից ղեկավարվող Ստամբուլում նմանատիպ գործողությունից երեք ամիս անց, որի ժամանակ ձերբակալվել էին Ստամբուլի քաղաքապետ Էքրեմ Իմամաօղլուն և քաղաքապետարանի այլ պաշտոնյաներ։
«Օրը սկսեցինք լուսաբացին՝ ևս մեկ գործողությամբ: Իզմիրի նախկին քաղաքապետ Թունչ Սոյերը, բարձրաստիճան պաշտոնյաներ, մեր նահանգապետ Շենոլ Ասլանօղլուն ձերբակալվել են վաղ առավոտյան: Մենք բախվում ենք Ստամբուլում տեղի ունեցածի նման մի գործընթացի: Ձերբակալված անձանց դեմ մեղադրանքները ներառում են հարցեր, որոնք հանրությանը հայտնի են վաղուց, նախկինում բացահայտվել, հետաքննվել կամ քննարկվել են քաղաքական հիմքերով: Այս ձերբակալությունները քաղաքական են»,- նշել է հայտարարել է նա։
Բաքանը հավելել է, որ Թուրքիայի նախագահ Ռեջեփ Թայիփ Էրդողանը վերջերս ազդարարել է այդ գործընթացը իր խոսքերով՝ «Ոչ միայն Ստամբուլը, այլև մյուս նահանգներն աղետի մեջ են»։
«Այսօրվա պատկերը վկայում է մի համակարգի մասին, որը գործում է հրահանգներով, այլ ոչ թե անկախ դատական համակարգով։ Մենք կշարունակենք մեր պայքարը օրենքի գերակայության և դատական համակարգի անաչառության համար»,- հայտարարել է նա։
Թարգմանությունը՝ Էմմա Չոբանյանի
