20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
PKK-ն այս շաբաթ կսկսի վայր դնել զենքերը․ ԶԼՄ-ներ
Քաղաքականություն
30.06.2025 | 22:45
Քուրդիստանի աշխատավորական կուսակցությունը (PKK), որն Անկարան ահաբեկչական է անվանում, այս շաբաթ կսկսի զենքերը վայր դնել։ Հղում անելով Իրաքի Քուրդիստանի տարածաշրջանային կառավարության (KRG) աղբյուրներին՝ Rudaw-ն հաղորդում է, որ խմբավորումը զենքերը կհանձնի որպես «բարի կամքի ժեստ»՝ անցյալ տարի մեկնարկած «Թուրքիա ահաբեկչությունից զերծ» նախաձեռնության շրջանակում, փոխանցում է Daily Sabah-ը։
Թուրքիայի նախագահ Ռեջեփ Թայիփ Էրդողանի գլխավորած ԱԶԿ-ի դաշնակից «Ազգայնական շարժում» կուսակցության (MHP) նախագահ Դևլեթ Բահչելին կոչ էր արել իշխանություններին հնարավորություն տալ PKK-ի բանտարկված առաջնորդ Աբդուլլահ Օջալանին ելույթ ունենալ խորհրդարանում և կոչ անել խմբին՝ վայր դնել զենքերը: Բահչելիի 2024 թվականի կոչը վերածվեց Օջալանի, իսկ ավելի ուշ՝ PKK-ից կողմից հաստատված նախաձեռնության:
Քրդամետ «Ժողովուրդների հավասարություն և ժողովրդավարություն» կուսակցության (DEM) պատգամավորների հետ բանակցություններից հետո Օջալանը համաձայնել էր հետևել Բահչելիի կոչին և փետրվարին կոչ արել PKK-ին դադարեցնել Թուրքիայի դեմ բռնության արշավը: Մայիսին PKK-ի համագումար էր գումարել և հայտարարել, որ ինքնալուծարվելու է:
Rudaw-ի հետ զրուցած աղբյուրները հայտնել են, որ PKK-ի շուրջ 30 անդամներ կմասնակցեն զենքը վայր դնելու արարողությանը, որը կկայանա «հուլիսի 3-ից 10-ը»՝ Հյուսիսային Իրաքի Սուլեյմանիե քաղաքում: Արարողությանը կհրավիրվեն նաև լրատվամիջոցները: Սուլեյմանիեն հայտնի է որպես PKK-ի գործունեության կենտրոն։
Լրատվամիջոցների հաղորդագրությունների համաձայն՝ PKK-ի զինյալներն արարողությունից կհեռանան անզեն՝ որպես «բարի կամքի և վստահության կառուցման խորհրդանիշ»։ Նույն աղբյուրները Rudaw-ին հայտնել են, որ PKK-ի անդամները կվերադառնան «իրենց բազաներ» և չեն կալանավորվի։ Rudaw-ը նաև հայտնում է, որ Օջալանը մի քանի օրվա ընթացքում նոր ուղերձ կհղի PKK-ի լուծարման մասին, և դա պաշտոնապես կմեկնարկի լուծարման գործընթացը։
«Թուրքիա ահաբեկչությունից զերծ» նախաձեռնության մասին առաջին անգամ ակնարկել էին պաշտոնյաները, այդ թվում՝ Բահչելին և Թուրքիայի նախագահ Ռեջեփ Թայիփ Էրդողանը։ Վերջինները բազմիցս ընդգծել են Թուրքիայի միասնության ապահովման և «ներքին ճակատի» ստեղծման անհրաժեշտությունը՝ նշելով, որ Իսրայելը ձգտում է պաղեստինցիների հետ իր հակամարտությունը տարածել ավելի լայն տարածաշրջանում և, ի վերջո, նաև Թուրքիայում։
Բահչելիի կոչին հաջորդեցին քրդական կուսակցության պատվիրակության այցելություններն Օջալանին Իմրալը կղզու բանտում, որտեղ նա պահվում է Մարմարա ծովում։
Նշվում է, որ նախաձեռնությունը, ինչպես սպասվում է, կշարունակվի այս ամռանը, և PKK-ն զենքերը կհանձնի Սիրիայի և Իրաքի իշխանություններին՝ թուրքական հետախուզության հսկողության ներքո։ Հանձնումից հետո ահաբեկչությանը չմասնակցող PKK-ի անդամները կընդունվեն Թուրքիայում՝ իրենց պատիժը կրելու համար՝ ըստ չհաստատված տեղեկությունների, մինչդեռ Իրաքում թաքնված խմբավորման պարագլուխները, հավանաբար, կմեկնեն երրորդ երկրներ։
Քրդամետ կուսակցությունը ձգտում է նախաձեռնության, այսպես կոչված, «պաշտոնականացմանը» և պնդում է խորհրդարանական հանձնաժողովի ստեղծման հարցում՝ նախաձեռնությունը վերահսկելու համար: Խորհրդարանն անցյալ չորեքշաբթի հետաձգել էր ամառային արձակուրդը՝ հավանաբար որոշելու համար նշված հանձնաժողովի ստեղծումը։
Թուրքիայի խորհրդարանի խոսնակ Նուման Քուրթուլմուշի հետ հանդիպումից հետո Դեմոկրատական կուսակցության պատգամավոր Փերվին Բուլդանը լրագրողներին ասել է, որ նրանք քննարկել են նախաձեռնության ներկայիս փուլը՝ այն որակելով որպես «դրական հանդիպում»։ Բուլդանն ասել է, որ առաջիկա օրերին ծրագրում են բանակցություններ վարել նաև Բահչելիի, նախագահ Ռեջեփ Թայիփ Էրդողանի և գլխավոր ընդդիմադիր Ժողովրդահանրապետական կուսակցության առաջնորդ Օզգյուր Օզելի հետ՝ նախաձեռնությունը քննարկելու համար։
Թարգմանությունը՝ Էմմա Չոբանյանի
