Ղարաբաղի հարցով ՖՄԿ-ի ընդունած վերջին բանաձևը հասանելի է միայն ֆրանսերենով

Հայաստանում օրերս ավարտվեց Ֆրանկոֆոնիայի միջազգային կազմակերպության 17-րդ գագաթնաժողովը, որի ընթացքում, ինչպես ՀՀ արտաքին գործերի նախարար Զոհրաբ Մնացականյանն է ասել, ընդունվել է վեց բանաձև։

ՖՄԿ նախարարական համաժողովի առաջին օրվա աշխատանքների վերաբերյալ ամփոփիչ ճեպազրույցի ժամանակ լրագրողի հարցին՝ արդյոք ղարաբաղյան hակամարտությունը բանաձևում ընդգրկվելո՞ւ է, նախարարը նշել է․«Կա վեց բանաձև, որոնցից մեկը վերաբերում է նման քաղաքական խնդիրներին, և այնտեղ կտեսնեք ձևակերպումը»:

Factor.am-ը փորձեց Արտաքին գործերի նախարարության պաշտոնական կայքէջից պարզել՝ որո՞նք են այդ վեց բանաձևերը և ի՞նչ շեշտադրումներ են արված ղարաբաղյան հակամարտությանը վերաբերող բանաձևում։

ԱԳՆ-ի կայքի հայերեն բաժնում նման հրապարակում չգտանք, իսկ ԱԳՆ լրատվական ծառայությունից մեզ հայտնեցին, որ նշված վեց բանաձևերի մասին հաղորդագրությունը տեղադրվել է կայքի միայն ֆրանսերեն բաժնում։

Ֆրանսերեն բաժնի ուսումնասիրությունից, սակայն, պարզ դարձավ, որ ՖՄԿ 17-րդ գագաթաժողովի ժամանակ ընդունված վեց բանաձևերի մասին հրապարակում այնտեղ ևս չկա։

Մեզ հաջողվեց պարզել, որ այդ հաղորդագրությունը տեղադրված է միայն Գագաթնաժողովի պաշտոնական կայքում՝ francophonieerevan2018.am/fr-ում։
Հաշվի առնելով ղարաբաղյան հարցով ընդունված բանաձևի կարևորությունը՝ Factor.am-ը այն ներկայացնում է հայերեն թարգմանությամբ։

«Վերահաստատում ենք մեր լիարժեք աջակցությունը ԵԱՀԿ Մինսկի խմբի համանախագահների ջանքերին՝ Լեռնային Ղարաբաղի հակամարտությունը բացառապես խաղաղ ճանապարհով կարգավորելու հարցում և հիշեցնում, որ երկարատև խաղաղությունը պահանջում է հակամարտության բոլոր կողմերի հավատարմությունը կարգավորման գործընթացին՝ հիմնված համանախագահների առաջարկների վրա»։

Փաստորեն, ՖՄԿ 17-րդ գագաթաժողովի ողջ ընթացքում հայերենով ԱԳ նախարարության լրատվական ծառայությունը տարածեց մամլո հաղորդագրություններ ՀՀ ժամանած հյուրերի, նախարարի հետ նրանց ունեցած հանդիպումների և ՖՄԿ աշխատանքների վերաբերյալ, իսկ ահա այդ աշխատանքի արդյունքը՝ ընդունված վեց բանաձևերը, հայերենով հասանելի չեն։

Հիշեցնենք, որ նախորդ տարի՝ 2017-ին, ՖՄԿ 16-րդ գագաթնաժողովի ժամանակ ղարաբաղյան խնդրի վերաբերյալ ևս բանաձև էր ընդունվել, որում, մասնավորապես, ասված էր․ «Կոչ ենք անում հակամարտության բոլոր կողմերին զերծ մնալ ուժի և ուժի սպառնալիքի կիրառումից, ինչը կարող է վտանգել կարգավորման խաղաղ գործընթացը, շարունակել բանակցությունները Մինսկի խմբի համանախագահների միասնական և անբաժան հենք հանդիսացող առաջարկությունների հիման վրա՝ մասնավորապես ուժի և ուժի սպառնալիքի չկիրառման, տարածքային ամբողջականության և ժողովուրդների իրավահավասարության և ինքնորոշման իրավունքի սկզբունքների հիման վրա»։

Աղավնի Սուքիասյան