ՀԷՑ-ը՝ «Հոմպլեքս» մոլի և Երևանում այսօրվա հոսանքազրկումների մասին

ՀԷՑ-ը հայտարարություն է տարածել՝ անդրադառնալով «Հոմպլեքս» մոլի, ինչպես նաև այսօրվա հոսանքազրկումներին։

«Հունիսի 25-ին «Հոմպլեքս» մոլի պաշտոնական բացման ընթացքում գրանցված էլեկտրամատակարարման ընդհատումը ՀԷՑ-ի էլեկտրատնտեսության սպասարկման տիրույթից դուրս էր: «Հոմպլեքս»-ի սնուցումն ապահովվում է երկու ուղղություններից, որոնցից ոչ մեկը «Հայաստանի էլեկտրական ցանցեր» ընկերությանը չի պատկանում. մեկը պատկանում է «Կարիտաս» ընկերությանը, մյուսը՝ ՀՀ Պետական եկամուտների կոմիտեին: Չնայած նրան, որ ընկերությունը վթարի վերացման որևէ պարտավորություն չուներ, հաշվի առնելով խնդրի կարևորությունը՝ վթարի ընթացքում ընկերությունը գործի է դրել նորոգող 4 բրիգադների, որոնք վերացրել են վթարը:

Այսօր՝ ժամը 13:54-ին Մայր Աթոռ Սուրբ Էջմիածնում տեղի ունեցող իրադարձությունների ժամանակ ևս հոսանքազրկում է տեղի ունեցել, որի հետևանքով հոսանքազրկվել է Երևանի մոտ 40 տոկոսը, ինչպես նաև Աշտարակ քաղաքի մի հատված: Հոսանքազրկկման պատճառ է հանդիսացել «Բարձրավոլտ էլեկտրական ցանցեր» ընկերությանը պատկանող «Շահումյան – 2» 220 կՎ ենթակայանում գրանցված վթարը: Այս դեպքը նույնպես դուրս է ՀԷՑ-ի պատասխանատվության դաշտից»,- ասված է հաղորդագրության մեջ:

Կառավարության նիստում Նիկոլ Փաշինյանը անդրադարձել էր էներգետիկայի ոլորտում խնդիրներին՝ նշելով, որ «Հոմպլեքս» հիպերմոլի բացմանը արարողության ժամանակ հիպերմոլը հոսանքազրկվել է։

Ըստ Փաշինյանի՝ այս հարցում երկու տարբերակ է քննարկվում. մի տարբերակն այն է, որ հատուկ սաբոտաժ է արվել, իսկ մյուսը՝ համակարգը տեխնիկապես ի վիճակի չէ աշխատել։