Ալիևը շնորհավորել է Փեզեշքիանին Իրան-Իսրայել հրադադարի համար ու հրավիրել Ստեփանակերտում գագաթնաժողովի

Ադրբեջանի նախագահ Իլհամ Ալիևը հեռախոսազրույց է ունեցել Իրանի նախագահ Մասուդ Փեզեշքիանի հետ։ Ադրբեջանական կողմի փոխանցմամբ՝ Ալիևը կրկին արտահայտել է Ադրբեջանի դիրքորոշումը Իրանի և Իսրայելի միջև հակամարտության վերաբերյալ և մտահոգությունը տարածաշրջանում իրավիճակի սրման վերաբերյալ։ Նա ցավակցություն է հայտնել վերջին իրադարձությունների ընթացքում Իրանի քաղաքացիների մահվան կապակցությամբ, վիրավորներին շուտափույթ ապաքինում մաղթել։

Ալիևը շնորհավորանքներ է փոխանցել Մասուդ Փեզեշքիանին Իրան-Իսրայել հակամարտության ավարտի և հրադադարի ձեռքբերման կապակցությամբ, և վերահաստատել, որ «տարածաշրջանում խաղաղությունն ու անվտանգությունը ամենակարևոր պայմաններն են»։

Փեզեշքիանը շնորհակալություն է հայտնել ցավակցությունների համար։

Հաղորդվում է, որ հեռախոսազրույցի ընթացքում պետությունների ղեկավարները մտքեր են փոխանակել երկկողմ հարաբերությունների հեռանկարների վերաբերյալ, գոհունակությամբ հիշել Մասուդ Փեզեշքիանի՝ Ադրբեջան կատարած այցը և ընդգծել այցի արդյունքում ձեռք բերված պայմանավորվածությունների իրականացման համար համատեղ ջանքերի շարունակականության կարևորությունը։

Ալիևը Փեզեշքիանին հրավիրել է հուլիսի սկզբին կայանալիք Տնտեսական համագործակցության կազմակերպության (ՏՀԿ) գագաթնաժողովին։

Հավելենք, որ ՏՀԿ գագաթնաժողովը Բաքուն անցկացնելու է հայաթափված Ստեփանակերտում։ Ըստ նախնական տեղեկությունների՝ գագաթնաժողովին մասնակցելու է Թուրքիայի նախագահ Ռեջեփ Թայիփ Էրդողանը։

Թարգմանությունը՝ Էմմա Չոբանյանի