Մայիսին ՀՀ-ում արձանագրված աշխատատեղերի հարցում ունենք բացարձակ ռեկորդ․ Փաշինյան․ ՏԵՍԱՆՅՈՒԹ

«Մայիսին մենք տնտեսական բավականին լավ ցուցանիշներ ենք արձանագրել, մեր տնտեսությունը ճկունության որոշակի դրսևորումներ է ցուցադրում՝ արագ արձագանքելով իրադրություններին»,- այս մասին կառավարության նիստում ասաց վարչապետ Նիկոլ Փաշինյանը։ Նա այնուհետև դիմեց Էկոնոմիկայի նախարար Գևորգ Պապոյանին, որպեսզի ներկայացնի տնտեսական ակտիվության ցուցանիշները։

Նախարարը տեղեկացրեց, որ տնտեսական ակտիվության ցուցանիշը 10.4 տոկոսով աճել է 2025-ի մայիսին՝ 2014 թվականի մայիսի նկատմամբ։ Պապոյանը թվարկեց, որ տնտեսական ակտիվության աճը պայմանավորված է ծխախոտի, սննդի արտադրության, հանքարդյունաբերոււթյան, շինարարության և ծառայությունների աճով։

«Պարզապես նախորդ տարի եղել է ոսկու վերամշակման պրոցես, որն այս տարի 41 տոկոսով կրճատվել է, և դրա հաշվին է, որ նրանց բարձր աճերը, ըստ էության, բերվել են, և արդյունքում մենք 5 տոկոսից մի փոքր ավելի կրճատում ունենք: Այսինքն՝ տնտեսության մեջ բավականին մեծ ակտիվություն կա, նաև արտադրության ոլորտներում, և եթե մենք ոսկու գործոնը չեզոքացնեինք, է՛լ ավելի մեծ արդյունք կունենայինք»,- պարզաբանեց նախարարը:

Տնտեսական աճի տեմպերի վերաբերյալ փաստեր թվարկեց նաև Նիկոլ Փաշինյանը։

Գործադիրի ղեկավարը հայտարարեց, որ մայիսին Հայաստանում արձանագրվել է աշխատատեղերի ռեկորդային աճ։ Ըստ Փաշինյանի՝ «ռեկորդային աշխատավարձով ապահովված 790 հազար 320 աշխատատեղ է գրանցվել», որը 2018 թվականի մայիսի նկատմամբ ավելի է 242 հազար 331-ով կամ 44 տոկոսով:

Մանրամասները՝ տեսանյութում։

Մանյա Պողոսյան