13.05.2026 | 23:30
Ադրբեջանը հիշատակվում է Պենտագոնի կողմից հրապարակված չբացահայտված թռչող օբյեկտների ֆայլերում
Սա մի նոր հոկտեմբերի 27-ից փրկվելու դեպք էր. Ալեն Սիմոնյան
Քաղաքականություն
25.06.2025 | 23:15
«Տեռորիստական ակտի նախապատրաստում էր, և որևիցե ձևով մենք չէինք կարող տարբերություն դնել հոկտեմբերի 27-ի հետ. սա մի նոր հոկտեմբերի 27-ից փրկվելու դեպք էր»,- Հանրային հեռուստաընկերության եթերում նման կարծիք հայտնեց Ազգային ժողովի նախագահ Ալեն Սիմոնյանը։
«Թե՛ պլանը և թե՛ ձայնագրությունը երբ որ համադրում ես, ստացվում է, որ նպատակը ՀՀ-ում քարոս ստեղծելն էր։ Եվ մի հետաքրքիր բան ասեմ, վերջին նիստերի ժամանակ դաշնակցական պատգամավորները վեր էին կենում և իրենց ելույթների մեջ մշտապես ասում էին. «Պատերազմից 5 րոպե է պակաս»»,- ասաց Սիմոնյանը։
«Սա մարդասպանի խոսակցություն է»,- նշեց ԱԺ նախագահը՝ անդրադառնալով ՀՀ քննչական կոմիտեի հրապարակած ձայնագրության այն հատվածին որում, ենթադրաբար, Բագրատ Գալստանյանը խոսում է մի քանի մարդու «գյուլլելու» մասին։
Հիշեցնենք՝ այսօր վաղ առավոտից խուզարկություններ էին սկսվել «Սրբազան պայքարի» ղեկավար Բագրատ Գալստանյանի և նրա համակիրների բնակարաններում։ Արդեն կեսօրին իր կեցավայրից բերման էր ենթարկվել Գալստանյանը, ավելի ուշ հայտնի դարձավ, որ նրան մեղադրանք է առաջադրվել ահաբեկչություն նախապատրաստելու, զանգվածային անկարգություններ հրահրելու հոդվածներով։
Քննչական կոմիտեն հաղորդագրություն էր տարածել, ըստ որի` «Սրբազան պայքար» անվանումով շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։
Քննչական գործողություններին զուգահեռ՝ Քննչական կոմիտեն մի քանի հաղորդագրություններ, ձայնագրություններ և լուսանկարներ հրապարակեց՝ հայտնելով «ահաբեկչական և իշխանությունը զավթելուն ուղղված գործողությունների» բացահայտման մասին:
Կոմիտեից հայտնել են, որ 16 անձանց նկատմամբ կալանքը որպես խափանման միջոց կիրառելու վերաբերյալ միջնորդություններ են ներկայացվել դատարան։
