06.10.2026 | 21:16
Ավանեսյանը այցելել է Շաքիում վիրավորված Անի Ավետիսյանի ընտանիքին
Հաագայում Թրամփն ու Զելենսկին հանդիպում են անցկացրել․ այն տևել է ավելի քան 40 րոպե
Քաղաքականություն
25.06.2025 | 18:23
Հաագայում ՆԱՏՕ-ի գագաթնաժողովի շրջանակներում հանդիպել են ԱՄՆ-ի և Ուկրաինայի նախագահներ՝ Դոնալդ Թրամփն ու Վլադիմիր Զելենսկին։ Այս մասին հայտնում են BBC-իի թղթակիցները։
Սա երկու երկրների առաջնորդների առաջին հանդիպումն է ապրիլի 26-ից ի վեր, երբ Զելենսկին և Թրամփը զրուցել էին Վատիկանում Հռոմի պապի հուղարկավորության արարողության ժամանակ։
Ուկրաինայի նախագահի մամուլի քարտուղար Սերգեյ Նիկիֆորովը հաստատել էր՝ առաջնորդների հանդիպումը սկսվել է։
Հիշեցնենք, որ այսօր ՆԱՏՕ-ի գագաթնաժողովի մեկնարկից առաջ լրագրողների հետ զրույցում Թրամփը հայտարարել էր, որ «Զելենսկին լավ տղա է»։
«Իհարկե, մենք կքննարկենք նրա դժվարությունները։ Նրա որոշ դժվարությունները։ Զելենսկին լավ տղա է», – ասել էր ԱՄՆ նախագահը։
Ավելի ուշ Ուկրաինայի նախագահ Վլադիմիր Զելենսկին շնորհակալություն է հայտնել Դոնալդ Թրամփին ՆԱՏՕ-ի գագաթնաժողովի շրջանակներում կայացած հանդիպման համար, որը տևել է ավելի քան 40 րոպե։
«Երկար և իմաստալից հանդիպում նախագահ Թրամփի հետ։ Քննարկվել են բոլոր իսկապես կարևոր հարցերը։ Շնորհակալություն պարոն նախագահին, շնորհակալություն Միացյալ Նահանգներին։ Խոսել ենք այն մասին, թե ինչպես հասնել հրադադարի և իրական խաղաղության։ Խոսել ենք այն մասին, թե ինչպես պաշտպանել մեր ժողովրդին։ Մենք գնահատում ենք խաղաղության հասնելուն նպաստելու ուշադրությունն ու պատրաստակամությունը», – գրել է Զելենսկին տելեգրամի իր ալիքում՝ խոստանալով ավելի ուշ զրույցի մանրամասները ներկայացնել։
Թարգմանությունը՝ Էմմա Չոբանյանի
