Կեղծ է, ուզում եմ պարզել՝ որտեղից իմ ստորագրությունը․ Հարությունյանը՝ աղմկահարույց հրապարակման մասին․ ՏԵՍԱՆՅՈՒԹ

Երևանի քաղաքապետարանի աշխատակազմի տրանսպորտի վարչության պետ Վազգեն Հարությունյանը Factor TV-ի տաղավարում խոսել է վերջերս մայրաքաղաքում կատարված երթևեկության փոփոխություններից ավտոբուսային նոր գծերի գործարկման մասին։ Նրա պնդմամբ՝  այդ հատվածներում խցանում չկա, նորմալ երթևեկություն է։

«Խցանում չկա, հոսքերը կարգավորվում են հետևյալ կերպ․ կարմիր լույսի ազդանշանի ժամանակ հոսքերի շատ լինելու պատճառով հավաքվում են տրանսպորտային միջոցները մինչև քաղաքապետարանի մուտքի մոտ, բայց կանաչ ազդանշանի ժամանակ այդ հոսքերն ազատում են տվյալ հատվածը։ Նույնը կատարվում է նաև Գրիգոր Լուսավորիչ փողոցում՝ Մաշտոցի պողոտայի հատվածում: Դա խցանում չէ, նորմալ երթևեկություն է, խցանում կլիներ, եթե կանգնեին ու չշարժվեին»,- մեկնաբանում է Հարությունյանը։

Պաշտոնյան դժվարացավ նշել, թե քաղաքացին ե՞րբ վերջապես կտեսնի փոփոխությունների համակարգված, ամբողջական արդյունքը։

Վազգեն Հարությունյանն անդրադարձավ նաև «Հետք»-ի հրապարակմանը, ըստ որի՝ պաշտոնյային պատկանող «Արմչի» ընկերությունը պայմանագրային ու գործընկերային կապեր է ունեցել չինական «Ժոնգ-Թոնգ» ընկերության հետ, որը Հարությունյանի պաշտոն ունենալուն պես պարբերաբար ավելի թանկ գնով հաղթում է ավտոբուսների խոշոր մրցույթներում։ Այդ մրցույթների գնահատող հանձնաժողովի կազմում ընդգրկված է եղել նաև Վազգեն Հարությունյանը։

Ըստ պահանջների՝ մրցույթում հաղթող ընկերությունը պետք է ավտոբուսների տեխնիկական սպասարկման պայմանագիր կնքեր տեղական ընկերություններից մեկի հետ, որն էլ այս դեպքում «Արմչի» ընկերությունն է։ Լրատվամիջոցն անգամ պայմանագրի լուսանկարն էր հրապարակել՝ Վազգեն Հարությունյանի ստորագրությայմբ։ Տրանսպորտի վարչության պետը մեր տաղավարում պնդեց, որ կեղծ են հրապարակման մեջ տեղ գտած տեղեկությունները, ասաց՝ ինքը այդ պայմանագրի գոյության մասին չգիտի և անգամ տեղյակ չէ, թե ինչպես է իր ստորագրությունը հայտնվել դրա տակ։ Նշեց՝ ուզում է պարզել, թե ինչպես է իր ստորագրությունը հայտնվել այդ պայմագրի վրա։ Չնայած այս պնդումներին՝ Հարությունյանը չի դիմել իրավապահ մարմիններին, միայն ֆեյսբուքում է գրառում արել։

«Ես սպառիչ պատասխան եմ ներկայացրել, դրանով է պայմանավորված, որ չեմ դիմել իրավապահներին․ սպասում եմ արձագանքների»,- ասաց Հարությունյանը։

Հարցազրույցն ամբողջությամբ՝ տեսանյութում։

Արփի Հակոբյան