Փաշինյանը կպարտվի Հայոց եկեղեցուն հայտարարած պատերազմում․ Լևոն Տեր-Պետրոսյանն ընդունել է Գարեգին Բ-ին

ՀՀ առաջին նախագահի խոսնակ Արման Մուսինյանը գրառմամբ տեղեկացրել է այսօր՝ հունիսի 25-ին, ՀՀ Առաջին նախագահ Լևոն Տեր-Պետրոսյանն իր առանձնատանը հյուրընկալել է Ամենայն Հայոց Կաթողիկոս Գարեգին Երկրորդին:

«Շուրջ մեկ ժամ տևած զրույցի ընթացքում, Հայաստանի ներկայիս իրավիճակի գնահատականից բացի, անդրադարձ է կատարվել նաև Սամվել Կարապետյանի նկատմամբ Փաշինյանի կողմից սանձազերծված հաշվեհարդարին, ինչի առիթը Եկեղեցու դեմ իշխանությունների հայտարարած պատերազմի համատեքստում վերջինիս արած հետևյալ հայտարարությունն է. «Եթե չհաջողվի քաղաքական գործիչներին, ուրեմն մենք էլ մեր ձևով ենք մասնակցելու այդ ամեն ինչին: Խոսք, որը ոչ այլ ինչ է, եթե ոչ սովորական քաղաքական հայտարարություն, ինչի իրավունքը, որպես Հայաստանի քաղաքացի, նա ունի։ Նախագահի գնահատմամբ՝ Փաշինյանը պարտության մարմնավորում է։ Նա խայտառակ կերպով պարտվեց արցախյան պատերազմում, հաստատաբար պարտվելու է նաև Հայոց եկեղեցուն հայտարարած պատերազմում»,- ասված է տարածված հաղորդագրությունում։

Հիշեցնենք, որ Սամվել Կարապետյանին մեղադրանք է ներկայացվել իշխանությունը զավթելու հրապարակային կոչի հոդվածով։ Կարապետյանը կալանավորվել է հունիսի 18-ին: Փաստաբաններն ապօրինի են որակում մեղադրանքը, հայտնում, որ ինքը՝ միլիարդատերը, չի ընդունում մեղադրանքը։

ԱԱԾ աշխատակիցները, որոնք վաղ առավոտից խուզարկում էին «Սրբազան պայքարի» առաջնորդ Բագրատ Գալստանյանի կեցավայրը, բերման են ենթարկել նրան։

Հիշեցնենք նաև, որ այսօր առավոտյան Քննչական կոմիտեն հաղորդագրություն էր տարածել՝ նշելով, որ «Սրբազան պայքար» անվանումով շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։ Կոմիտեն ձայնագրություններ է հրապարակել, թե ինչպես է պլանավորվել հեղաշրջման ենթադրյալ փորձը։