«Գնանք Մայր Աթոռ, ընդեղ ջարդենք, փշրենք, կոտորենք, ընդեղից քշենք Երևան»․ ՔԿ-ի ձայնագրությունը․ ՏԵՍԱՆՅՈՒԹ

ՀՀ Քննչական կոմիտեն ներկայացրել է «Սրբազան պայքար» անվանումը կրող շարժման ղեկավարների և մասնակիցների կողմից ահաբեկչության և իշխանությունը յուրացնելու նախապատրաստություն կատարելու դեպքի առթիվ նախաձեռնված քրեական վարույթի շրջանակներում գաղտնի քննչական գործողությունների արդյունքում ձեռք բերված ձայնագրությունները։ ՔԿ-ի հրապարակած ձայնագրությունում հնչող ձայնի տեմբրից ենթադրել է, որ խոսողները մեկը «Սրբազան պայքար»-ի առաջնորդ Բագրատ արքեպիսկոպոս Գալստանյանն է։

Տվյալ ձայնագրությունում նա ասում է․ «Ասում եմ՝ չբռնենք ամսի 4-ին լիքը ժողովուրդ հավաենք գնանք Էջմիածին, մի հատ հավաքվենք բռնենք, սատկացնենք ու քշենք Երևան։ Ըտեղից էլ սկսենք ամեն ինչը։ Ասում եմ՝ չբռնե՞նք էս մեր խմբերին ասենք՝ նախապես պատրաստվեն, սրանք գալիս ենք Մայր Աթոռ։ Մի խումբ գնանք Մայր Աթոռ սրանց ընդեղ ջարդենք, փշրենք, կոտորենք, ընդեղից քշենք Երևան։ Խմբերին ասենք՝ էս ժամին պատրաստ եղեք, սաղ փակելու ենք»,- մեջբերման ավարտը։

Ձայնագրությունում լսվում է այլ տղամարդու ձայն, նա մասնավորապես ասում է․ «Ներկի մասով ով կանի։ Չախալյանենց խմբից մարդ չկա էդ գործն անի։ Գաղափարն ինքն է տվել։ Չախալյանենք ուզում են Արթուրենց հետ լինեին։ Արթուրենք մի քիչ բանով ուզում էին Հովհաննեսենց հետ լինեին։ Հիմա էդ խմբերը կամ պիտի միացնենք մի հանձնարարական տանք կամ Չախալյանենց առանձին հանձնարարական տանք»,- մեջբերման ավարտը։
Հիշեցնենք՝ այսօր վաղ առավոտից իրավապահները «Սրբազան պայքարի» ղեկավար կազմի և համակիրների տներում խուզարկություններ են իրականացվել։ Կեսօրին իր կեցավայրից բերման է ենթարկվել «Սրբազան պայքար»-ի առաջնորդ Բագրատ Գալստանյանը։ Խուզարկություն է իրականացվել նաև ընդդիմադիր «Հայաստան» պատգամավոր Արթուր Սարգսյանի տանը։ Խուզարկություններին զուգահեռ՝ Քննչական կոմիտեն մի քանի հաղորդագրություններ, ձայնագրություններ և լուսանկարներ հրապարակեց, հայտնելով «ահաբեկչական և իշխանությունը զավթելուն ուղղված գործողությունների» բացահայտման մասին:

ՔԿ-ի փոխանցմամբ՝ այս պահին կա 14 ձերբակալված անձ։ 16 անձի նկատմամբ հանրային քրեական հետապնդում հարուցելու որոշում է ընդունվել, որոնք բավարարվել են. ««Սրբազան պայքար» շարժման ղեկավարների և մասնակիցների կողմից ահաբեկչության և իշխանությունը յուրացնելու նախապատրաստություն կատարելու դեպքերի առթիվ քրեական վարույթի շրջանակներում իրականացվել են ավելի քան 9 տասնյակ խուզարկություններ, որոնց արդյունքում հայտնաբերվել են նշված հանցագործություններին առնչվող, նախաքննությամբ ձեռք բերված տվյալները հաստատող առարկաներ և փաստաթղթեր, ինչպես նաև ապացուցողական նշանակություն ունեցող անհերքելի այլ փաստական տվյալներ, այդ թվում՝ հրազեն և ռազմամթերք, գործողությունների պլաններ, հավաքագրված անձանց ցուցակներ, մետաղական իրեր, ճայթրուկներ, ծխարձակող միջոցներ, զինվորական հանդերձանք, ռադիոկապի միջոցներ, անօդաչու թռչող սարքեր, թմրամիջոցին նմանվող բուսական զանգվածներ»։ Բացի այս, ըստ ՔԿ-ի, հայտնաբերվել է բռնի կերպով իշխանությունը յուրացնելուց հետո գործադիր իշխանության համապատասխան պաշտոններում նշանակվող անձանց ցուցակ, «խմբի կողմից իրականացվելիք ապօրինի գործողությունների մանրակրկիտ պլանավորման, դրանց հերթականության, ժամանակագրության վերաբերյալ փաստաթղթեր և այլն:

Մանրամասները՝ տեսանյութում։