16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
Բրյուսելը Ադրբեջանին կոչ է անում հարգել մարդու իրավունքները․ ԵՄ-ն արձագանքել է Abzas Media-ի լրագրողների ազատազրկմանը
Քաղաքականություն
24.06.2025 | 16:13
Եվրամիությունն արձագանքել է ադրբեջանական անկախ Abzas Media-ի լրագրողների ազատազրկմանը։ «Abzas Media-ի լրագրողների և աշխատակիցների նկատմամբ բանտարկության խիստ դատավճիռները մտահոգիչ զարգացում են»,- ասվում է ԵՄ արտաքին գործողությունների ծառայության հայտարարության մեջ։
Նշվում է, որ անկախ լրագրությունը կարևոր դեր է խաղում թափանցիկության, հաշվետվողականության և տեղեկացված հանրային քննարկման ապահովման գործում։
«Եվրոպական Միությունը կոչ է անում Ադրբեջանին հարգել մարդու իրավունքներն ու հիմնարար ազատությունները, կատարել իր միջազգային պարտավորությունները և անհապաղ քայլեր ձեռնարկել բոլոր լրագրողների և լրատվամիջոցների աշխատողների համար անվտանգ և նպաստավոր միջավայր ապահովելու համար։
ԵՄ-ն շարունակում է հանձնառու մնալ Ադրբեջանի հետ մարդու իրավունքների շուրջ երկխոսությունն ու համագործակցությունը շարունակելու հարցում»,-ասվում է հայտարարության մեջ։
Հիշեցնենք, որ ավելի վաղ Բաքվի ծանր հանցագործությունների դատարանը Abzas Media-ի տնօրեն Ուլվի Հասանլիին, գլխավոր խմբագիր Սևինջ Վագիֆքըզիին, հետաքննող լրագրող Հաֆիզ Բաբալիին և «Ազատություն» ռադիոկայանի լրագրող, տնտեսագետ Ֆարիդ Մեհրալիզադեին դատապարտել էր 9 տարվա ազատազրկման, լրագրողներ Նարգիզ Աբսալամովային և Էլնարա Գասիմովային՝ 8 տարվա, իսկ Abzas Media-ի համակարգող Մուհամմադ Կեկալովին՝ 7 տարի 6 ամսվա ազատազրկման։
Թարգմանությունը՝ Էմմա Չոբանյանի
