Բաքուն դատապարտել է Վլադիմիր Սոլովյովին «Արցախ» տեղանունն օգտագործելու համար և սպասում է ներողության

Ադրբեջանի լրատվամիջոցների զարգացման գործակալությունը (MEDİA) հայտարարություն է տարածել Վլադիմիր Սոլովյովի՝ Ռուսաստանի պետական ​​«Ռոսիա 1» հեռուստաալիքով հեռարձակված վերջին հաղորդման կապակցությամբ։ «Հեռուստահաղորդավար Վլադիմիր Սոլովյովը, իրեն բնորոշ կողմնակալությամբ և հիստերիկ վարքագծով կրկին անհարգալից վերաբերմունք է ցուցաբերել Ադրբեջանի նկատմամբ Ռուսաստանի պետական ​​«Ռոսիա 1» հեռուստաալիքով հեռարձակվող իր հեղինակային հաղորդման ժամանակ»,-ասվում է հայտարարության մեջ։

Նշվում է, որ հաղորդավարը, «պաշտպանելով իր մտերիմ ընկերոջը՝ հայազգի ռուս գործարար Սամվել Կարապետյանին», որը ձերբակալվել էր Հայաստանում իրավապահ մարմինների կողմից, մի քանի անգամ օգտագործել է «Արցախ» արտահայտությունը, մեղադրել է Հայաստանի իշխանություններին «Արցախը հանձնելու» մեջ, ինչպես նաև ուղիղ եթերում դիմելով հայ ժողովրդին՝ ասել է, որ ապագայում նրան սպասվում է «Արցախի ճակատագիրը»։

Գործակալությունը նշում է, թե «իրական պատմական փաստերը խեղաթյուրելով, մոտ անցյալում տեղի ունեցած գործընթացների նկատմամբ կողմնակալ լինելով՝ Վլադիմիր Սոլովյովը միշտ էլ չարություն և ատելություն է տածել Ադրբեջանի նկատմամբ, այդ վերաբերմունքը հստակ դրսևորվել է նրա ելույթներում» ։

«Նման ապակառուցողական հայտարարությունների հայտնվելը Ռուսաստանի պետական ​​հեռուստաալիքի եթերում անհանգստություն է առաջացնում, անընդունելի է համարվում մեր ժողովրդի համար և լիովին հակասում է մեր երկրների միջև բարեկամական հարաբերությունների ոգուն և այս հարցում Ռուսաստանի պաշտոնական դիրքորոշմանը։ Մենք անընդունելի ենք համարում ու խստորեն դատապարտում ատելության այս դրսևորումը, որը անհամատեղելի է լրագրողական էթիկայի և բարոյական արժեքների հետ և սպասում ներողության»,- ասվում է հայտարարության մեջ։

Հիշեցնենք՝ Սոլովյովի հաղորդումը բուռն հակազդեցություն էր առաջացրել ՀՀ-ում՝ թեմային այսօր անդրադարձ էր կատարվել նաև ԱԺ-ում։

Թարգմանությունը`Էմմա Չոբանյանի