Էրդողանն ու Փեզեշքիանը հեռախոսազրույց են ունեցել

Թուրքիայի նախագահ Ռեջեփ Թայիփ Էրդողանը Իրանի նախագահ Մասուդ Փեզեշքիանի հետ հեռախոսազրույցում քննարկել է Իսրայել-Իրան հակամարտությունը, ինչպես նաև տարածաշրջանային և համաշխարհային հարցեր։

«Նշելով, որ մի շարք շփումներ է ունեցել առաջնորդների հետ Իսրայելի և Իրանի միջև բախումների վերաբերյալ՝ նախագահ Էրդողանը նշել է, որ Թուրքիան պատրաստ է միջնորդի դեր ստանձնել հակամարտությունները հնարավորինս շուտ դադարեցնելու և միջուկային բանակցություններին վերադառնալու համար»,- ասվում է Թուրքիայի նախագահականի տարածած հաղորդագրության մեջ։

Հավելենք, որ նախօրեին վերջին օրերի ընթացքում արդեն երկրորդ անգամ Էրդողանը հեռախոսազրույց էր ունեցել ԱՄՆ նախագահ Դոնալդ Թրամփի հետ։ Ըստ թուրքական կողմի՝ Էրդողանը հայտնել է, որ գոհունակությամբ է ընդունում նախագահ Թրամփի վերջին հայտարարությունները, որոնք միտված են Իսրայելի և Իրանի միջև բախումների դադարեցմանը և տարածաշրջանում խաղաղության հաստատմանը։ Նա շեշտել է, որ անհրաժեշտ է անհապաղ քայլեր ձեռնարկել՝ կանխելու մի աղետ, որը կարող է ամբողջ տարածաշրջանը «կրակի մեջ առնել, և որ միջուկային վեճի կարգավորման միակ ուղին դիվանագիտական ճանապարհն է», իսկ Թուրքիան պատրաստ է ցուցաբերել ցանկացած աջակցություն, այդ թվում՝ միջնորդություն։

Էրդողանը նաև ընդգծել է, որ Իրանի դեմ Իսրայելի հարձակումներով սկսված բռնության շղթան երկու կողմերի համար էլ առաջ է բերում անդառնալի տնտեսական ու քաղաքացիական վնասներ, և որ այս վտանգավոր զարգացումները պետք է անհապաղ դադարեցվեն։

Թարգմանությունը՝ Էմմա Չոբանյանի