29.04.2026 | 17:33
Ազատ ոճի ըմբշամարտի Հայաստանի հավաքականն ամփոփել է Եվրոպայի առաջնությունը․ ՏԵՍԱՆՅՈՒԹ
Իսրայելում Իրանի գիշերային հարվածների հետևանքով վիրավորվել է շուրջ 300 մարդ, ուրբաթ օրվանից ի վեր առնվազն 24 մարդ է զոհվել
Քաղաքականություն
16.06.2025 | 13:16
Իսրայելի Առողջապահության նախարարությունը հայտնում է, որ գիշերը երկրի հյուսիսում և կենտրոնում Իրանից հրթիռային հարձակումների հետևանքով հոսպիտալացվել է 287 մարդ, գրում է The Times of Israel-ը։
Մեկ մարդ ծանր վիճակում է, իսկ 14-ը՝ միջին ծանրության, այդ թվում՝ երկուսը՝ Փետահ Տիկվայի «Շնեյդեր» մանկական հիվանդանոցում։ Մնացած վիրավորների մեծ մասը թեթև վնասվածքներ ունի կամ սուր ցնցում է տարել։ Գերատեսչությունը չի նշել Բնեյ Բրակի «Մաայանեյ Հայեշուա» հիվանդանոց տեղափոխված 15 մարդկանց վիճակի մասին։ Թել Ավիվից արևելք գտնվող քաղաքը գիշերը հրթիռակոծության է ենթարկվել, որի հետևանքով մեկ մարդ զոհվել է։
Հայֆայի քաղաքապետ Յոնա Յահավը հաստատել է, որ քաղաքում գիշերը իրանական հրթիռային հարձակման հետևանքով զոհվել է երեք մարդ։ Յահավը Channel 12 News-ին ասել է, որ երեքն էլ աշխատում էին մի օբյեկտում, որը «շատ կարևոր է իրենց համար այդ տարածքում»։
Գիշերային հարձակումների զոհերի թիվը հասել է ութի։
Յահավը նշել է, որ քաղաքի մի քանի բնակելի տներ և այլ շենքեր մեծ վնաս են կրել, բայց միայն չորս մարդ է հոսպիտալացվել թեթև վնասվածքներով։
Իսրայելում ուրբաթ օրվանից ի վեր իրանական հարվածների հետևանքով առնվազն 24 մարդ է զոհվել։ Այս մասին հայտնել է Իսրայելի վարչապետի գրասենյակը վերջին հարձակումներից հետո թարմացված տվյալներում։ Երկուշաբթի հրապարակված զոհերի թիվը ներառում է կեսգիշերից ի վեր գրանցված 11 զոհ, այդ թվում՝ չորսը՝ Թել Ավիվի մոտ գտնվող Փետահ Տիկվայում, երեքը՝ Հայֆայում և մեկը՝ Թել Ավիվի Բնեյ Բրակ արվարձանում։ Նշվում է նաև, որ Բատ Յամի վրա ավելի վաղ հասցված հարվածից հայտնաբերվել է երկու դի, մեկ այլ զոհ էլ՝ չճշտված վայրում։
Հիշեցնենք, որ ավելի վաղ Իսրայելը հայտնել էր, որ Իրանի գիշերային հարվածների հետևանքով զոհվել է 5, վիրավորվել՝ ավելի քան 90-ը։
Թարգմանությունը՝ Էմմա Չոբանյանի
