05.12.2025 | 14:55
Մայր Աթոռը դատապարտում է Արշակ արքեպիսկոպոս Խաչատրյանի կալանավորումը
Մենք ագրեսոր չենք, իրավունք ունենք օգտվել միջուկային էներգիայից․ Փեզեշքիան
Քաղաքականություն
16.06.2025 | 13:44
Իրանի նախագահ Մասուդ Փեզեշքիանը խորհրդարանում կայացած նիստում անդրադարձել է Իսրայելի հարձակմանը, փոխանցում է IRNA գործակալությունը։
«Մենք ագրեսորներ չենք։ Այսօր, ավելի քան երբևէ, մեզ անհրաժեշտ է միասնություն և համախմբվածություն, և Իրանի ողջ ժողովուրդը պետք է ձեռք ձեռքի տված կանգնի և ուժեղ կանգնի տեղի ունեցած ագրեսիայի դեմ»,- հայտարարել է Իրանի նախագահը։
Նա շեշտել է՝ իրենք «գնացել և անուղղակի բանակցություններ են սկսել»։
«Գերագույն հոգևոր առաջնորդի քաղաքականության հիման վրա մենք չենք ձգտում միջուկային զենք ունենալ, և սա մեր համոզմունքն է։ Նրանք ասում են՝ Իրանը չպետք է միջուկային զենք ստանա, մինչդեռ մենք ընդհանրապես այդ զենքը ստանալու մտադրություն չունենք։ Մենք իրավունք ունենք օգտվելու միջուկային էներգիայից և հետազոտություններից, որոնք օգուտ են բերում հասարակությանը, և ոչ ոք իրավունք չունի խլել այս իրավունքը համակարգից և Իսլամական Հանրապետությունից։ Մենք վճռականորեն տրամադրված ենք իրականացնելու այս իրավունքը և չենք վախենում որևէ ուժից՝ կապված մեր իրավունքի իրականացման հետ»,- ասել է Իրանի նախագահը։
Փեզեշքիանը, միաժամանակ, հայտարարել է, որ «Ամերիկան ուժ է կիրառում և, միջազգային կանոններին հակառակ, թույլ է տալիս Իսրայելին ներխուժել և հարձակվել իրենց երկրի վրա»։
Նա նաև նշել է՝ իրենք պատերազմ չեն փնտրել և պատերազմ չեն սկսել, իրենք չեն սպանել երկրի հրամանատարներին և գիտնականներին։
Հիշեցնենք, որ Իսրայելը հունիսի 13-ին հարձակում է սկսել Իրանի վրա՝ թիրախավորելով միջուկային օբյեկտները, ռազմական և էներգետիկ ենթակառուցվածքները: Հարվածների հետևանքով զոհվել են բարձրաստիճան զինվորականներ, միջուկային ոլորտի գիտնականներ և խաղաղ բնակիչներ։ Իրանն էլ ի պատասխան հարվածներ է հասցնում Իսրայելի տարածքին:
Թարգմանությունը՝ Էմմա Չոբանյանի
