Թրամփը հույս է հայտնել է, որ Իրանն ու Իսրայելը հրադադարի համաձայնության կհասնեն

ԱՄՆ նախագահ Դոնալդ Թրամփը Իսրայել-Իրան հրադադարի հույս ունի։ Սակայն, ըստ նրա, երկրները երբեմն ստիպված են «պայքարել դրա համար», գրում է Reuters-ը։

Կանադայում կայանալիք G7 գագաթնաժողովին մեկնելուց առաջ լրագրողների հետ զրույցում Թրամփը հայտարարել է, որ Միացյալ Նահանգները կշարունակի աջակցել Իսրայելին, սակայն հրաժարվել է ասել՝ արդյո՞ք ԱՄՆ դաշնակցին հորդորել է դադարեցնել Իրանի դեմ հարվածները։

Հարցին, թե ի՞նչ է անում Իրանի և Իսրայելի միջև իրավիճակն ապաէսկալացնելու  համար, Թրամփը պատասխանել է․ «Հուսով եմ՝ գործարք կլինի։ Կարծում եմ՝ գործարքի ժամանակն է։ Տեսնենք, թե ինչ կլինի, բայց երբեմն նրանք ստիպված են լինում պայքարել։ Կարծում եմ՝ լավ հնարավորություն կա, որ գործարք կլինի»։

Հիշեցնենք, որ նախօրեին Reuters-ը, երկու ամերիկացի պաշտոնյայի վկայակոչելով, հայտնել էր, որ  վերջին օրերին Դոնալդ Թրամփը վետո է դրել Իսրայելի կողմից Իրանի գերագույն հոգևոր առաջնորդ այաթոլլահ Ալի Խամենեիին սպանելու ծրագրի վրա։

«Իրանցիները սպանե՞լ են մեկ ամերիկացու։ Ո՛չ։ Մինչև նրանք դա չանեն, մենք նույնիսկ չենք խոսի քաղաքական ղեկավարությանը հետապնդելու մասին»,- անանուն մնալու պայմանով ասել էր ԱՄՆ վարչակազմի բարձրաստիճան պաշտոնյան։

Ըստ աղբյուրների՝ իսրայելցիները հայտարարել են, որ իրենք ունեն Իրանի բարձրագույն հոգևոր առաջնորդին սպանելու տարբերակ, սակայն Թրամփը մերժել է այդ ծրագիրը։

Իսրայելի Ազգային անվտանգության խորհրդի ղեկավար Ցախի Հանեգբին էլ ասել էր, որ «Reuters-ի հաղորդումն այն մասին, որ ԱՄՆ-ը վետո է դրել Ալի Խամենեիի սպանության վրա, կեղծիք է»։

Թարգմանությունը՝ Էմմա Չոբանյանի