Սարկոզին զրկվել է Պատվո լեգեոնի և «Վաստակի համար» շքանշաններից

Ֆրանսիայի նախկին նախագահ Նիկոլա Սարկոզին զրկվել է երկրի բարձրագույն պարգևից՝ Պատվո լեգեոնի շքանշանից։ Համապատասխան հրամանագիրը հրապարակվել է կիրակի, հունիսի 15-ին՝ Ֆրանսիայի կառավարության Journal Officiel պաշտոնական կայքում։

Նշենք՝ նախագահը շքանշանից զրկվում է առաջին անգամ 1945 թվականից ի վեր։ Ըստ հրապարակված փաստաթղթի՝ Սարկոզիի վերաբերյալ որոշումը կայացվել է դեռևս հունիսի 5-ին։ Նրա անդամակցությունը Պատվո լեգեոնին դադարեցվել է հետադարձ ուժով՝ 2023 թվականի մայիսի 17-ից։

Սարկոզին դարձել էր Պատվո լեգեոնի ասպետ 2004 թվականին։ 2007-ին, ընտրվելով նախագահ, նա ինքնաբերաբար դարձել էր Բարձր խաչի ասպետ, ինչը անդամակցության ամենաբարձր կարգավիճակն է։ 2007-2012 թվականներին պետության ղեկավարի կարգավիճակով Սարկոզին նաև հանդիսացել է շքանշանի մեծ մագիստրոսը։

Նույն որոշումը ընդունվել է նաև «Վաստակի համար» շքանշանի մասով, որը Սարկոզին նույնպես ստացել էր ավտոմատ կերպով՝ նախագահ ընտրվելուց հետո 2007-ին։ Այս շքանշանից էլ է նա զրկվել հետադարձ ուժով՝ սկսած 2023 թվականի մայիսի 17-ից։

Սարկոզին դարձել է Ֆրանսիայի պատմության մեջ երկրորդ նախագահը, ում զրկել են Պատվո լեգեոնից։ Առաջինը եղել է մարշալ Ֆիլիպ Պետենը՝ 1945 թվականին, որը համագործակցել էր Հիտլերի հետ։

Սարկոզիի շքանշաններից զրկումը կապված է դատարանի վճռի հետ, ըստ որի նա դատապարտվել է 1 տարվա ազատազրկման՝ կոռուպցիոն գործով։ Ինչպես բացատրում է AFP գործակալությունը, Ֆրանսիայում մեկ տարվա և ավելի ազատազրկման դատավճիռը ավտոմատ կերպով հանգեցնում է պետական պարգևներից զրկման։

2025 թվականի ապրիլին նախագահ Էմանուել Մակրոնը հանդես էր եկել Սարկոզիի շքանշաններից զրկման դեմ։

«Շատ կարևոր է, որ նախկին նախագահներն արժանանան հարգանքի»,-հայտարարել էր նա։ AFP-ի տվյալներով՝ Մակրոնը հաճախ է շփվում Սարկոզիի հետ։