«Ոչ ոք երբեք չպետք է սպառնա մեկ ուրիշի գոյությանը»․ Հռոմի պապը Իրանի և Իսրայելի առաջնորդներին կոչ է արել հրաժարվել պատերազմից

Հռոմի պապ Լևոն XIV-ը շաբաթ օրը կոչ է արել Իրանի և Իսրայելի առաջնորդներին հրաժարվել պատերազմից և երկխոսություն սկսել համընդհանուր բարօրության համար․ գրում է vaticannews-ը։

«Ոչ ոք երբեք չպետք է սպառնա մեկ ուրիշի գոյությանը»,- ասել է Պապը։

Հռոմի պապը նաև ընդգծել է «միջուկային սպառնալիքից զերծ ավելի անվտանգ աշխարհ կառուցելու հանձնառության» անհրաժեշտությունը, որը, ինչպես նա հավելել է, «պետք է իրականացվի հարգալից հանդիպումների և անկեղծ երկխոսության միջոցով՝ արդարության, եղբայրության և համընդհանուր բարօրության վրա հիմնված երկարատև խաղաղություն կառուցելու համար»։

«Բոլոր երկրների պարտականությունն է աջակցել խաղաղության գործին՝ նախաձեռնելով հաշտեցման ուղիներ և խթանելով լուծումներ, որոնք երաշխավորում են բոլորի անվտանգությունն ու արժանապատվությունը», – եզրափակել է նա։

Հիշեցնենք, որ Իսրայելը հունիսի 13-ի վաղ առավոտյան հարձակվել է Իրանի վրա։ Հարվածների ժամանակ նահատակվել են Իրանի զինված ուժերի շտաբի պետ, գեներալ-մայոր Մոհամմադ Հոսեյն Բաքերին, Իսլամական հեղափոխության պահապանների կորպուսի հրամանատար, գեներալ-մայոր Հոսեյն Սալամին, Իրանի «Խաթամ ​​ալ-Անբիա» կենտրոնական շտաբի հրամանատար, գեներալ-մայոր Ղոլամ Ալի Ռաշիդը, ԻՀՊԿ-ի ավիատիեզերական ուժերի հրամանատար, գեներալ-մայոր Ամիր Ալի Հաջիզադեն և առնվազն վեց իրանցի միջուկային գիտնականներ։ Մահացել է Իրանի 78 քաղաքացի, վիրավորվել 320-ը։

Իրանն ի պատասխան հրթիռային երեք հարձակում է գործել Իսրայելի վրա։ Իսրայելը հայտնել է 4 զոհի և 70-ից ավելի վիրավորների մասին, ինչպես նաև Թել Ավիվում ու Ռամաթ Գանում ավերածությունների ու շինությունների փլուզումների մասին։ Նշվում է, որ փլատակների տակ մարդիկ կան։

Թարգմանությունը՝ Անահիտ Խաչատրյանի