19.12.2025 | 21:15
Գարեգին Բ-ն մտադիր չէ հեռանալ․ քաղաքական գնահատականներ՝ Մայր Աթոռում տեղի ունեցածի շուրջ
Հայաստանը վճռական է արձագանքելու կլիմայի փոփոխությանը՝ համակարգված և շարունակական քայլերով. ՇՄ փոխնախարար
14.06.2025 | 12:57
Երևանում կայացել է Համաշխարհային բանկի «Երկրի կլիմայի և զարգացման զեկույց»-ի (Country Climate and Development Report – CCDR) պաշտոնական մեկնարկի միջոցառումը, որն առանձնահատուկ հարթակ էր կլիմայի փոփոխության և կայուն զարգացման օրակարգերի շուրջ համատեղ քննարկումների համար․ հայտնում են Շրջակա միջավայրի նախարարությունից:
«Համաշխարհային բանկի կողմից մշակված զեկույցը Հայաստանի համար առաջարկում է ռազմավարական ուղենիշներ՝ ուղղված կլիմայի փոփոխության մարտահրավերներին դիմակայելուն՝ միաժամանակ խթանելով տնտեսական աճը։ Այն ընդգծում է էներգետիկ անվտանգության և անկախության ամրապնդման անհրաժեշտությունը, բնական ռեսուրսների կայուն կառավարման կարևորությունը, ինչպես նաև պարենային և ջրային անվտանգության բարելավման ուղիները։
Զեկույցում առանձնահատուկ տեղ է հատկացվում էներգետիկ ոլորտում կանաչ անցման՝ մասնավորապես գազից արևային էներգիայի անցման կարևորությանը»,- ասված է հաղորդագրությունում։
Շրջակա միջավայրի նախարարի տեղակալ Արամ Մեյմարյանը, իր ողջույնի խոսքում, նշել է․ «Կլիմայի փոփոխությունն այսօր ամենամեծ գլոբալ մարտահրավերներից մեկն է։ Հայաստանը վճռական է արձագանքելու դրան՝ համակարգված և շարունակական քայլերով։ CCDR զեկույցը կարևոր հիմք է՝ ոլորտում առկա խոչընդոտների բացահայտման, զարգացման առաջնահերթությունների ձևակերպման և քաղաքականության բարելավման համար։ Մենք հավատում ենք, որ միայն մասնակցային մոտեցման, վարքագծային փոփոխությունների և համատեղ ջանքերի միջոցով կարող ենք հասնել մեր կլիմայական նպատակներին»։
