Իրանի ԶՈՒ-ն մարտական պատրաստության է բերված. այաթոլլահ Խամենեիի ուղերձը

Իրանի հոգևոր առաջնորդ այաթոլլահ Ալի Խամենեին ուղերձ է հղել ժողովրդին, հաղորդում է ՌԻԱ Նովոստին։

«Իսրայելը չպետք է մտածի, որ կարող է խուսափել Իրանին հարվածների պատասխանից։ Թել Ավիվը պատերազմ է սանձազերծել, Թեհրանն ուժով կպատասխանի։ Բոլորը կարծում են, որ Իսրայելի դեմ պետք է ուժ կիրառել, և ուժը կկիրառվի։ Թող չկարծեն, թե իրենք հարվածել են, և դրանով գործը կավարտվի։ Նրա՛նք սկսեցին դա: Նրա՛նք սանձազերծեցին պատերազմը։ Մենք թույլ չենք տա, որ նրանք ողջ մնան այն չարագործությունից հետո, որ արել են Իրանի դեմ»,- հայտարարել է Իրանի գերագույն առաջնորդը:

Նա ընդգծել է, որ Իսրայելը «մեծ սխալ է թույլ տվել»՝ հարձակվելով Իրանի վրա: Խամենեիի խոսքով՝ Իրանի զինված ուժերը բերված են մարտական պատրաստության բարձր աստիճանի:

Ավելի վաղ տեղեկացրել էինք, որ Իրանը հրթիռների երկրորդ ալիքն է արձակել Իսրայելի ուղղությամբ. մի քանի հրթիռ հարվածել է ազգային անվտանգության նախարարության շենքին։

Հիշեցնենք, որ Իսրայելի ռազմաօդային ուժերը հունիսի լույս 13-ի գիշերը հարվածել են Իրանի տարածքին, որից հետո Իսրայելը փակել է իր օդային տարածքը: Իսրայելի  բանակի տվյալներով՝ հարվածները հասցվել են Իրանում միջուկային ծրագրի և այլ ռազմական օբյեկտների հետ կապված տասնյակ թիրախների։ Իսրայելական  բանակը հայտնել է, որ գիշերը հարվածներ են հասցվել Իրանում ավելի քան 100 թիրախների: Գործողությանը մասնակցել է 200 կործանիչ: Հաղորդվում է, որ զոհվել է Իրանի ԶՈՒ-ի երեք բարձրաստիճան հրամանատար, ինչպես նաև 6 միջուկային գիտնական: Իրանի «Ֆարս» լրատվական գործակալությունը հաղորդում է, որ գիշերը Իսրայելի հարվածների հետևանքով զոհվել է 78 մարդ։