Իրանը հրթիռների երկրորդ ալիքն է արձակել Իսրայելի ուղղությամբ. մի քանի հրթիռ հարվածել է ազգային անվտանգության նախարարության շենքին. ԶԼՄ

Իսրայելի բանակը հայտարարել է, որ հրթիռներ են արձակվել Իրանի տարածքից, դրանք թռչում են Իսրայելի ուղղությամբ: Բոլոր քաղաքացիներին խորհուրդ է տրվել գնալ ապաստարաններ և «այնտեղ մնալ՝ մինչև հատուկ կարգադրություն», հաղորդում Է AFP-ն:

Իրանի զինված ուժերը բալիստիկ հրթիռների երկրորդ ալիքն են արձակել Իսրայելի տարածքի ուղղությամբ՝ ի պատասխան Իսրայելի ագրեսիայի, հայտնում է IRNA գործակալությունը։ Աղբյուրի տեղեկություններով՝ հրթիռներն արդեն մոտենում են հրեական պետությանը։ Արձակված արկերի քանակը չի նշվում։

Իրանն ավելի քան 100 բալիստիկ հրթիռ է արձակել Իսրայելի ուղղությամբ, հաղորդում է Reuters-ը՝ նշելով, որ Թել Ավիվում և Երուսաղեմում օդային տագնապ է հայտարարվել։

Ըստ գործակալության՝ Իրանի մի քանի հրթիռներ հարվածել են Իսրայելի ազգային անվտանգության նախարարության շենքին։

Հիշեցնենք, որ Իսրայելի ռազմաօդային ուժերը հունիսի լույս 13-ի գիշերը հարվածել են Իրանի տարածքին, որից հետո Իսրայելը փակել է իր օդային տարածքը: Իսրայելի  բանակի տվյալներով՝ հարվածները հասցվել են Իրանում միջուկային ծրագրի և այլ ռազմական օբյեկտների հետ կապված տասնյակ թիրախների։ Իսրայելական  բանակը հայտնել է, որ գիշերը հարվածներ են հասցվել Իրանում ավելի քան 100 թիրախների: Գործողությանը մասնակցել է 200 կործանիչ: Հաղորդվում է, որ զոհվել է Իրանի ԶՈՒ-ի երեք բարձրաստիճան հրամանատար, ինչպես նաև 6 միջուկային գիտնական: Իրանի «Ֆարս» լրատվական գործակալությունը հաղորդում է, որ գիշերը Իսրայելի հարվածների հետևանքով զոհվել է 78 մարդ։