20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Հաջորդ հարձակումներն ավելի դաժան կլինեն, Իրանը պետք է գործարք կնքի․ Թրամփ
Քաղաքականություն
13.06.2025 | 16:38
«Ես Իրանին հնարավորություն էի տվել գործարք կնքել։ Ես նրանց ասել էի՝ «պարզապես արեք դա», բայց անկախ նրանից, թե որքան ջանք թափեցին, անկախ նրանից, թե որքան մոտեցան, նրանք պարզապես չկարողացան դա անել»,- Truth Social սոցիալական ցանցում այս մասին գրել է գրել է ԱՄՆ նախագահ Դոնալդ Թրամփը։
«Ես նրանց ասացի, որ շատ ավելի վատ կլինի, քան նրանք կանխատեսում կամ ասում էին։ Ասում էի, որ Միացյալ Նահանգներն արտադրում է աշխարհի լավագույն և ամենամահացու ռազմական տեխնիկան, և որ Իսրայելն ունի դրանցից շատերն ու դեռ շատ ավելին կունենա, և նրանք գիտեն, թե ինչպես օգտագործել դրանք։ Որոշ իրանցի կոշտ գծի կողմնակիցներ համարձակորեն խոսում էին, բայց նրանք չգիտեին, թե ինչ է պատահելու»,- հայտարարել է Թրամփը։
Նա հավելել է՝ նրանք բոլորը հիմա մահացել են, իսկ իրավիճակը միայն ավելի է վատանալու։
«Արդեն մեծ մահեր և ավերածություններ են եղել, բայց դեռ ժամանակ կա այս կոտորածին վերջ տալու համար, որի հաջորդ՝ արդեն պլանավորված հարձակումներն ավելի դաժան կլինեն։ Իրանը պետք է գործարք կնքի և փրկի այն, ինչը մի ժամանակ հայտնի էր որպես Իրանական կայսրություն։ Պարզապես արեք դա, քանի դեռ չափազանց ուշ չէ»,- հայտարարել է ԱՄՆ նախագահը։
Մեկ այլ գրառմամբ Թրամփը նշել է, որ երկու ամիս առաջ Իրանին 60-օրյա վերջնագիր է տվել՝ «գործարք կնքելու» համար։
«Նրանք պետք է դա անեին։ Այսօր 61-րդ օրն է։ Ես նրանց ասացի, թե ինչ անեն, բայց նրանք պարզապես չկարողացան հասնել դրան։ Հիմա նրանք, թերևս, երկրորդ հնարավորությունն ունեն»,- նշել է ԱՄՆ նախագահը։
Ավելի վաղ Դոնալդ Թրամփը Fox News-ին տված հարցազրույցում հերթական անգամ հայտարարել էր, որ Իրանը չի կարող միջուկային զենք ունենալ, և Վաշինգտոնը դեռևս հույս ունի վերադառնալ բանակցությունների սեղանի շուրջ։
Հիշեցնենք, որ Իսրայելի ռազմաօդային ուժերը հունիսի լույս 13-ի գիշերը հարվածել են Իրանի տարածքին, որից հետո Իսրայելը փակել է իր օդային տարածքը: Իսրայելի բանակի տվյալներով՝ հարվածները հասցվել են Իրանում միջուկային ծրագրի և այլ ռազմական օբյեկտների հետ կապված տասնյակ թիրախների։ Իսրայելական բանակը հայտնել է, որ գիշերը հարվածներ են հասցվել Իրանում ավելի քան 100 թիրախների: Գործողությանը մասնակցել է 200 կործանիչ: Հաղորդվում է, որ զոհվել է Իրանի ԶՈՒ-ի երեք բարձրաստիճան հրամանատար, ինչպես նաև 6 միջուկային գիտնական:
Թարգմանությունը՝ Էմմա Չոբանյանի
