Իրանը չի կարող միջուկային ռումբ ունենալ, հույս ունենք վերադառնալ բանակցությունների սեղանի շուրջ․ Թրամփ

ԱՄՆ-ի և Իրանի ներկայացուցիչների միջև ապրիլից ի վեր բանակցությունների հաջորդ՝ վեցերորդ փուլը պետք է տեղի ունենար այս շաբաթավերջին Օմանում:

Սուլթանության իշխանությունները հայտարարել են, որ դատապարտում են Իսրայելին Իրանի տարածքին հարվածելու համար։ Օմանն այս գործողություններն անվանել է վտանգավոր սրացում և ասել, որ դրանք կարող են սպառնալ տարածաշրջանի անվտանգությանն ու կայունությանը։

Միաժամանակ, Իրանի պետական ​​հեռուստատեսությունը հաղորդել է, որ Իսրայելի հարվածների հետևանքով վիրավորվել է առնվազն 50 մարդ։

«Իսրայելի հարձակումից հետո մոտ 50 վիրավոր տեղափոխվել է [Թեհրանի] Չամրանի հիվանդանոց, որոնցից առնվազն 35-ը կանայք և երեխաներ են»,- հաղորդել է հեռուստաալիքը։

Հիշեցնենք, որ Իսրայելի ռազմաօդային ուժերը հունիսի լույս 13-ի գիշերը հարվածել են Իրանին, որից հետո Իսրայելը փակել է իր օդային տարածքը: Իսրայելի բանակի տվյալներով՝ հարվածները հասցվել են Իրանում միջուկային ծրագրի և այլ ռազմական օբյեկտների հետ կապված տասնյակ թիրախների։ Իսրայելական կողմը հայտնել է նաև, որ գործողությանը մասնակցել է 200 կործանիչ:

Հարձակման է ենթարկվել Իսլամական Հանրապետության ռազմական և գիտական ​​ղեկավարությունը: Մասնավորապես, հարվածների հետևանքով զոհվել են Իրանի զինված ուժերի գլխավոր շտաբի պետ Մոհամմադ Բաղերին, Իսլամական հեղափոխության պահապանների կորպուսի (ԻՀՊԿ) հրամանատար Հոսեյն Սալամին և իրանցի միջուկային գիտնականներ Ֆերեյդուն Աբբասի Դավանին ու Մոհամմադ Մեհդի Թեհրանչին:

Թարգմանությունը՝ Էմմա Չոբանյանի