Իրանը լիովին պատրաստ է դիմակայել ցանկացած ռազմական սպառնալիքի. ԻՀՊԿ գլխավոր հրամանատարը զգուշացրել է

Իրանի Իսլամական հեղափոխության պահապանների կորպուսի (ԻՀՊԿ) գլխավոր հրամանատար, գեներալ-մայոր Հոսեյն Սալամին հայտարարել է, որ Իրանը լիովին պատրաստ է ցանկացած սցենարի և ունի հստակ ռազմավարություն՝ ցանկացած հնարավոր ագրեսիային հակազդելու համար։

«Թշնամին երբեմն մեզ սպառնում է ռազմական գործողություններով։ Մենք միշտ ասել ենք, և հիմա էլ կրկնում ենք, որ լիովին պատրաստ ենք ցանկացած սցենարի, ցանկացած հանգամանքներում»,- հայտարարել է Հոսեյն Սալամին։

Նա հավելել է՝ թշնամին «սխալմամբ կարծում է, որ կարող է ռազմական հարված հասցնել Իրանին նույն ձևով, ինչպես հարձակվում է Գազայի պաշարված և անպաշտպան պաղեստինցիների վրա»։

«Նրանք չկարողացան դիմակայել եմենցի երիտասարդությանը և ջախջախվեցին, ինչպե՞ս կարող են դիմակայել Իրանի նման մեծ ազգի»,- ասել է իրանցի գեներալը։

ԻՀՊԿ-ի գլխավոր հրամանատարը զգուշացրել է ցանկացած սխալ հաշվարկից՝ ասելով, որ Իրանի զինված ուժերը տարիներ շարունակ «պատրաստ են եղել պատերազմի ցանկացած մակարդակում»։

Այս նախազգուշացումը հնչում է այն ժամանակ, երբ Միացյալ Նահանգները պատրաստվում է իր դեսպանատների ոչ հիմնական աշխատակիցների և նրանց ընտանիքների տարհանմանը տարածաշրջանից, քանի որ ԱՄՆ հետախուզական տվյալները ցույց են տալիս, որ Իսրայելը ծրագրում է հարվածել Իրանի միջուկային օբյեկտներին։

Իրանի պաշտոնյաները զգուշացրել են, որ երկրի դեմ ցանկացած ագրեսիա կհանգեցնի արագ և ուժեղ հակահարվածի, իսկ տարածաշրջանում ամերիկյան շահերը և ռազմական բազաները կնշվեն որպես պոտենցիալ թիրախներ։

Լրատվամիջոցները հայտնել էին, որ Իսրայելը դիտարկում է Իրանի դեմ ռազմական գործողություններ առաջիկա օրերին, հավանաբար, առանց ԱՄՆ-ի աջակցության։

Թարգմանությունը՝ Էմմա Չոբանյանի