Քաղաքականություն
12.06.2025 | 22:11
Իսրայելն ազատ է արձակել երկու թուրք ակտիվիստների, որոնք ձերբակալվել էին Գազայի հատվածի շրջափակումը խախտելու փորձ կատարող նավի վրա։ Այս մասին հայտնել են Թուրքիայի արտաքին գործերի նախարարության աղբյուրները, գրում է Daily Sabah-ը։
Աղբյուրները հայտնել են, որ Յասեմին Աջարը և Սուայբ Օրդուն մեկնել են Թել Ավիվի Բեն Գուրիոն օդանավակայանից։
Գերմանիայի քաղաքացի Աջարը և Օրդուն 12 ուղևորների թվում էին, որոնց միացել էր նաև շվեդ կլիմայական ակտիվիստ Գրետա Թունբերգը։ Նրանք Madleen նավով փորձում էին ճեղքել Իսրայելի կողմից Գազայի շրջափակումը և խորհրդանշական քանակությամբ օգնություն հասցնել։
Իսրայելը նավը միջազգային ջրերում կալանել էր և հաջորդ օրն արտաքսել Թունբերգին ու ևս երեք ակտիվիստի։ Եվս վեց ակտիվիստ արտաքսվել է հինգշաբթի, իսկ վերջին երկու ակտիվիստները, հավանաբար, կարտաքսվեն ուրբաթ։
Ըստ տեղական Adalah մարդու իրավունքների կազմակերպության՝ ակտիվիստները ենթարկվել են «վատ և ագրեսիվ վերաբերմունքի, պատժիչ միջոցների, իսկ երկու կամավորներ որոշ ժամանակ պահվել են մենախցում»։
Իսրայելի իշխանությունները հրաժարվել են մեկնաբանել տեղեկությունը։ Թել Ավիվը պնդում է, որ ձերբակալվածների հետ վարվում է օրինական ձևով և հետաքննում է բռնության վերաբերյալ ցանկացած մեղադրանք։
Թարգմանությունը՝ Էմմա Չոբանյանի
