29.04.2026 | 14:33
Բաքվում Նիդերլանդների դեսպանը մեկնաբանել է երկրի խորհրդարանի կողմից Արցախի մասով ընդունված բանաձևը
Ադրբեջանում ընդդիմադիր «Մուսավաթ» կուսակցության 3 անդամներ են ազատազրկվել
Քաղաքականություն
12.06.2025 | 23:09
Ադրբեջանի իշխանությունները շարունակում են ընդդիմադիրների և լրագրողների ձերբակալությունները։ Մասնավորապես, ադրբեջանական լրատվամիջոցների հաղորդմամբ, ավարտվել է ընդդիմադիր «Մուսավաթ» կուսակցության մեջլիսի անդամներ Ալադդին Ալեսքերլիի, Քոշգար Նուրալըի և կուսակցության ակտիվիստ Ջաբիր Վելիևի դեմ հարուցված քրեական գործով դատավարությունը։
Նշվում է, որ Ալադդին Ալեսքերլին և Ջաբիր Վելիևը դատապարտվել են 2 տարի 3 ամիս, իսկ Քոշգար Նուրալըն՝ 2 տարի ժամկետով ազատազրկման։ Նրանք մեղավոր են ճանաչվել մի խումբ անձանց կողմից կատարված խուլիգանության մեջ։
Քրեական գործի հարուցման պատճառը «Մուսավաթ» կուսակցության Բիլասուվարի շրջանային կազմակերպության կողմից անցյալ տարվա դեկտեմբերի 31-ին շրջանում տոնական միջոցառում անցկացնելուց հետո տեղի ունեցած միջադեպն է։
«Այդ օրը կուսակցության ակտիվիստների դեմ կազմակերպվել է սադրանք, որոնց դեմ հարուցվել է քրեական գործ։ Չնայած պաշտոնական բժշկական փորձաքննությունը հաստատել է, որ Ալեսքերլին սադրանքի ժամանակ ստացել է մարմնական վնասվածքներ, դատարանը սահմանափակվել է սադրիչի համար տուգանքով և առանց որևէ հիմքի որոշում է կայացրել «Մուսավաթ»-ի ակտիվիստների ազատազրկման մասին»,- ասվում է կուսակցության հայտարարության մեջ։
Կուսակցությունն այս դատավճիռը համարում է Ադրբեջանում բռնաճնշումների շարունակություն և պահանջում է նրանց անհապաղ ազատ արձակել։
Հիշեցնենք, որ ավելի վաղ իրավապաշտպանները նոր տվյալներ էին ներկայացրել, ըստ համաձայն՝ Ադրբեջանում քաղբանտարկյալների թիվը հասել է 375-ի։
Թարգմանությունը՝ Էմմա Չոբանյանի
