Հնդկաստանում օդանավի կործանման հետևանքով, նախնական տեղեկություններով, 133 մարդ է զոհվել

Հնդկաստանի Ահմադաբադի օդանավակայանի մոտ Air India ավիաընկերության օդանավի վթարի հետևանքով զոհվել է առնվազն 133 մարդ։ Միջադեպը տեղի է ունեցել, երբ Air India-ի օդանավը, որը տեղափոխում էր 232 ուղևորի և անձնակազմի 10 անդամի, տեղի ժամանակով 13:17-ին Լոնդոն էր թռչում, գրում է News18-ը։

Իշխանությունները դեռևս չեն հայտնել վթարի պատճառը։

Հնդկաստանի վարչապետ Նարենդրա Մոդին վթարի վերաբերյալ զրուցել է ներքին գործերի նախարար Ամիտ Շահի և քաղաքացիական ավիացիայի նախարար Ռամմոհան Նաիդուի հետ։ Վարչապետը խնդրել է ապահովել տուժածներին անհրաժեշտ օգնությունը։

Hintustan Times-ի աղբյուրների տվյալներով՝ Air India-ի օդանավի վթարի հետևանքով զոհվել է առնվազն 120 մարդ։

Մեծ Բրիտանիայի վարչապետ Քիր Սթարմերը տեղեկացվել է ավիաաղետի մասին: Air India-ի տվյալներով՝ ինքնաթիռում գտնվող 53 ուղևոր Մեծ Բրիտանիայի քաղաքացիներ էին, որոնք ուղևորվում էին Լոնդոն: Օդանավում եղել է նաև 169 հնդիկ, 7 պորտուգալացի և մեկ կանադացի ուղևոր։

«Հնդկաստանի Ահմադաբադ քաղաքում Լոնդոն թռչող ինքնաթիռի վթարի տեսարանները, որը տեղափոխում էր բազմաթիվ բրիտանացի քաղաքացիների, սարսափելի են: Ես տեղեկացված եմ իրավիճակի զարգացման մասին, իմ մտքերը ուղևորների և նրանց ընտանիքների հետ են այս խորապես ցավալի պահին»,- ասել է Մեծ Բրիտանիայի վարչապետը։

Հնդկաստանի վարչապետ Նարենդրա Մոդին էլ իր առաջին պաշտոնական հայտարարության մեջ ասել է, որ վթարն իրեն «ապշեցրել և տխրեցրել է»։

«Ահմադաբադում տեղի ունեցած ողբերգությունը մեզ ապշեցրել և տխրեցրել է։ Այն անասելի սրտաճմլիկ է։ Այս տխուր ժամին իմ մտքերը բոլոր տուժածների հետ են։ Կապի մեջ եմ եղել նախարարների և իշխանությունների հետ, որոնք աշխատում են տուժածներին օգնելու համար»,- նշել է Մոդին։

Թարգմանությունը՝ Էմմա Չոբանյանի