12.03.2026 | 10:45
22 միլիոն դրամ՝ «Հոգևոր-մշակութային հանրային Հ/Ը» -ի լուծարման գործընթացը վերջնականացնելու համար
Լեհաստանի վարչապետը «մեծամասնություն է ձևավորում ԵՄ-ում»՝ Վրաստանի հետ վիզային ազատ ռեժիմը չեղարկելու համար
Քաղաքականություն
12.06.2025 | 13:09
Լեհաստանի վարչապետ Դոնալդ Տուսկը հայտարարել է, որ իր կառավարությունը լոբբինգ է անում ԵՄ պետությունների շրջանում՝ Վրաստանի քաղաքացիների համար ԵՄ առանց վիզայի մուտքը չեղարկելու համար։ Տուսկն այս մեկնաբանություններն արել է չորեքշաբթի Լեհաստանի խորհրդարանում ունեցած ելույթի ժամանակ ներգաղթի մասին խոսելիս՝ նախքան իր կառավարությանը վստահության կարևոր քվե շնորհելը, գրում է OC Media-ն։
«Մենք ստեղծում ենք անհրաժեշտ մեծամասնություն՝ Վրաստանի և այլ երկրների հետ առանց վիզայի ռեժիմը սահմանափակելու կամ կասեցնելու համար։ Այո՛, սա նաև իմ մտադրությունն է՝ լիովին գիտակցելով, որ վրացիների մեկ երրորդը մարդիկ են, ովքեր շատ կցանկանային կիսել մեր արժեքները, բայց մենք գիտենք, թե ինչում է խնդիրը։ Խոսքը միայն Վրաստանի մասին չէ։ Ընդհանուր առմամբ, ես կողմնակից եմ առանց վիզայի մուտքի սահմանափակմանը այն երկրների համար, որոնք, ինչպես Վրաստանի դեպքում, այլևս չեն հարգում ոչ ավտորիտար իշխանությունների վերաբերյալ չափանիշները, ինչպես նաև այն այն երկրների, որտեղից միգրացիան ուղղակի սպառնալիք է ներկայացնում մեր երկրի կամ Եվրոպայի օրինականության և կարգուկանոնի համար»,- ասել է նա։
ԵՄ-ն 2017 թվականին վերացրել է Վրաստանի քաղաքացիների համար ԵՄ երկրների մեծ մաս մուտքի վիզա ստանալու պահանջը: Այս քաղաքականությունը ժողովրդականություն է վայելում վրացիների շրջանում, և կառավարությունը հաճախ սա ներկայացնում է որպես իր հիմնական նվաճումներից մեկը։
Առանց վիզայի ռեժիմի չեղարկումը կպահանջի ԵՄ անդամ պետությունների որակյալ մեծամասնության աջակցությունը, այսինքն՝ 27 անդամ պետությունից 15-ի, որոնք ներկայացնում են դաշինքի ընդհանուր բնակչության առնվազն 65%-ը։
Լրատվամիջոցը գրում է՝ քանի որ վերջին տարիներին Վրաստանի կառավարությունը գնալով ավելի ավտորիտար է դառնում, մի քանի հաղորդագրություններ են եղել այն մասին, որ Բրյուսելում քննարկվում է առանց վիզայի ռեժիմի կասեցման հարցը։ Նման հաղորդումներն ավելի հաճախակի են դարձել 2024 թվականի հոկտեմբերի վիճարկվող խորհրդարանական ընտրություններից և կառավարության կողմից ԵՄ անդամակցության գործընթացը սառեցնելու հետագա հայտարարությունից, ինչպես նաև ցուցարարների նկատմամբ բռնություններից հետո։
Անդրադառնալով հանցավորության հետ կապված հարցին՝ Տուսկը նշել է, որ իր կառավարությունը երկրից հանցագործների ամենօրյա արտաքսումներ է իրականացնում։
«Վրաստանից հանցագործների վերջին արտաքսումը տեղի է ունեցել չորս օր առաջ, արտաքսվել է հանցավոր գործունեության մեջ կասկածվող 50 վրացի», – ասել է նա։
Վերջին ամիսներին Լեհաստանում վրացի հանցագործների հարցը դարձել է քննարկումների թեժ թեմա։
Թարգմանությունը՝ Էմմա Չոբանյանի
