08.09.2026 | 13:02
Ինչու էր քաղաքապետարանը մտել Նարեկ Նալբանդյանի 88 սուպերմարկետ. պարզաբանում է Բաբայանը․ ՏԵՍԱՆՅՈՒԹ
ՌԴ ԶՈւ-ն 2-րդ գիշերն անընդմեջ ԱԹՍ-ներով գրոհել է Խարկովը․ կան տուժածներ, այդ թվում՝ երեխաներ
Քաղաքականություն
12.06.2025 | 11:04
Ռուսական զորքերը հունիսի լույս 12-ի գիշերը կրկին անօդաչու թռչող սարքերով հարվածել են Խարկովին։ Տեղական իշխանությունները հայտնում են, որ կան տուժածներ, այդ թվում՝ երեխաներ, փոխանցում է Current time-ը։
Խարկովի քաղաքապետ Իգոր Տերեխովը գրում է, որ «գրանցվել է 11 հարված», ևս մեկ «Շահեդ» չի պայթել։
«Հարվածների տակ են հայտնվել բնակելի թաղամասեր, կրթական հաստատություններ, մանկապարտեզներ և ենթակառուցվածքներ։ Տասնյակ մեքենաներ են վնասվել, դպրոցների և տների պատուհաններ են կոտրվել։ Գրանցվել է առնվազն 12 տուժած, այդ թվում՝ չորս երեխա»,- ասվում է հաղորդագրության մեջ։
Խարկովի մարզային ռազմական վարչակազմի ղեկավար Օլեգ Սինեգուբովն էլ հայտնել է, որ վիրավորվել են երկու տարեկան տղա, 12, 16 և 17 տարեկան աղջիկներ։
Ուկրաինայի արտակարգ իրավիճակների պետական ծառայությունը նշում է, որ հրդեհներ են բռնկվել քաղաքի Սալտովսկի, Սլոբիդսկի և Շևչենկովսկի շրջաններում։ Այրվել են տներ, խանութներ, մեքենաներ։ Ըստ ծառայության՝ վիրավորվել է 14 մարդ, այդ թվում՝ չորս երեխա։
Տերեխովը նաև հաղորդել է բնակելի շենքերին և կրթական հաստատություններին հարակից տարածքներում հրդեհների մասին։
«Որոշ դեպքերում բեկորներն ընկել են անմիջապես մանկական խաղահրապարակների կողքին։ Հարվածներից մեկը վնասել է բազմահարկ շենքի վերելակի հորը, մյուսը ոչնչացրել է ոչ բնակելի շենքի մի մասը և հասարակական տրանսպորտի կանգառը»,- պնդում է Խարկովի քաղաքապետը։
Ուկրաինայի ռազմաօդային ուժերը հայտնում են, որ հունիսի լույս 12-ի գիշերը ռուսական զորքերը հարձակվել են Ուկրաինայի վրա 63 ԱԹՍ-ով։
Հարվածի հիմնական տարածքներն են Խարկովի, Դոնեցկի և Օդեսայի մարզերը։ Նաև նշվում է, որ ՀՕՊ-ը կարողացել է չեզոքացնել 49 անօդաչու թռչող սարք։
Հունիսի լույս 11-ի գիշերը ռուսական բանակը անօդաչու թռչող սարքերով կրկին հարվածել էր Խարկովին։ Երեք մարդ էր զոհվել, հայտարարվել է 64 տուժածի մասին, նրանց թվում՝ ինը երեխա։
Թարգմանությունը՝ Էմմա Չոբանյանի
