17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
Ուկրաինայի հրաժարումը փոխզիջումից կհանգեցնի տարածքների հետագա կորստի․ Մեդինսկի
Քաղաքականություն
11.06.2025 | 20:49
Ռուսաստանի նախագահի օգնական, ռուսական բանակցային թիմի ղեկավար Վլադիմիր Մեդինսկին «Wall Street Journal»-ին ասել է, որ Ուկրաինայի կողմից փոխզիջման գնալուց հրաժարվելը կհանգեցնի նրան, որ Կիևը կկորցնի ավելի շատ տարածքներ, փոխանցում է BBC-ի ռուսական ծառայությունը։
«Մենք խաղաղություն ենք ուզում։ Բայց եթե Ուկրաինան շարունակի առաջնորդվել ուրիշների ազգային շահերով, մենք պարզապես ստիպված կլինենք արձագանքել»,- ասել է նա։
Մեդինսկին WSJ-ին ասել է, որ Արևմուտքն Ուկրաինայում պատերազմը դիտարկում է որպես հակամարտություն, օրինակ, Ֆրանսիայի և Անգլիայի միջև՝ երկու երկրների, որոնք ունեն իրենց սեփական պատմությունն ու մշակույթը: Նրա կարծիքով՝ Ռուսաստանի պատերազմն Ուկրաինայի հետ եղբայրասպան հակամարտություն է ընդհանուր պատմություն և լեզու ունեցող երկրների միջև:
«Դա նման է երկու եղբայրների՝ ավագի և կրտսերի միջև հակամարտության, թե ով է ավելի խելացի և կարևոր։ Ցավոք, այս հակամարտությունը սրում է մեր տարաձայնությունները, ուստի մենք կցանկանայինք այն հնարավորինս շուտ ավարտել»,- ասել է նա։
«Եթե Ռուսաստանն իրեն համարում է Կենտրոնական կամ Արևելյան Եվրոպայի որևէ ազգի «եղբայր», ապա այս պատմության մեջ նա Կայենն է՝ արդեն քարը ձեռքին»,- արձագանքել է Ուկրաինայի արտաքին գործերի նախարարության խոսնակ Գեորգի Տիխին։
Սոցիոլոգիական հարցման համաձայն՝ 2024 թվականի ամռանն ուկրաինացիների ավելի քան 70%-ը ուկրաիներենը համարում է իրենց մայրենի լեզուն և առօրյա կյանքում խոսում է միայն այդ լեզվով, միաժամանակ, 90%-ը ռուս ժողովրդին «եղբայրական» չի համարում։
Թարգմանությունը՝ Էմմա Չոբանյանի
