21.02.2026 | 10:49
Արտարժույթների փոխարժեքները՝ փետրվարի 21-ի դրությամբ
Դատավոր Արտուշ Գաբրիելյանը դեմ է տեսանկարահանմանը․ այսօր մեկնարկեց նրա գործի քննությունը
Հասարակություն
11.06.2025 | 17:17
Հակակոռուպցիոն դատարանում, նախագահությամբ դատավոր Խաչիկ Ղազարյանի, այսօր սկսվեց Երևանի քրեական դատարանի դատավոր Արտուշ Գաբրիելյանի և մյուսների գործի քննությունը։ Դատավորը մեղադրվում է կաշառք ստանալու մեջ։
Ըստ մեղադրանքի՝ նա ընկերոջ՝ Գալուստ Խուրշուդյանի օժանդակությամբ Զոհրաբ Սիխարուլիձեից /Յեզգատյան/ պահանջել է խոշոր չափերով կաշառք։ Քրեական գործում առկա տվյալների համաձայն՝ Գաբրիելյանը կաշառքի գումարը չի ստացել, սակայն արարքը կաշառք ստանալ որակելու համար բավարարել է նաև կաշառքի գումարը պահանջելը։
Զոհրաբ Սիխարուլիձեի վերաբերյալ 2011 թվականին թմրանյութերի ապօրինի շրջանառությանն առնվող քրեական գործ է ուղարկվել դատարան, որը մակագրվել է դատավոր Արտուշ Գաբիելյանին, սակայն գործի քննությունից 6 ամիս անց Գաբրիելյանը կասեցրել է դրա վարույթը՝ հաշվի առնելով այն հանգամանքը, որ մեղադրյալը քրոնիկ հիվանդություն է ունեցել։
2023-ի հունվարին, այսինքն՝ կասեցումից 12 տարի անց, Գաբրիելյանը վերսկսել է գործի վարույթը և քննում էր մինչև հիմա։ Ըստ Գաբիելյանի վերաբերյալ վարույթի՝ գործի քննությունը վերսկսելուց հետո է նա կաշառք պահանջել մեղադրյալից։
Այսօրվա նիստի մեկնարկին Արտուշ Գաբրիելյանը, կաշառքի օժանդակության մեջ մեղադրող Գալուստ Խուրշուդյանն ու Զոհրաբ Սիխարուլիձեն առարկեցին ուղիղ հեռարձակման, տեսանկարահանման և լուսանկարահանման դեմ։
Քրեական դատավարության օրենսգրքի համաձայն՝ մեղադրյալի առարկությունն արդեն բավարար է տեսանկարահանումն արգելելու համար, ուստի դատարանը չթուլատրեց ուղիղ հեռարձակում կան տեսանկարահանում իրականացնել։ Ինչ վերաբերում է լուսանկարահանմանը, դատարանը թույլատրեց լուսանկարահանել մեղադրանքի կողմին, այսինքն՝ հանրային մեղադրողներին և դատարանին։
Շուտով պարզվեց, որ գործում ներգրավված պաշտպաններից Սամվել Ջաղինյանը, որը ներկայացնում է Գալուստ Խուրշուդյանի շահերը, գործի նյութերը չի ստացել, ուստի դատարանը որոշեց հետաձգել նիստը։
Նշենք, որ Արտուշ Գաբրիելյանը մայիսի 1-ից կալանքի տակ է։ Քրեական հետապնդման ընթացում, մինչև նրա վերաբեյալ վերջնական դատական ակտի ուժի մեջ մտնելը, նա պահպանելու է դատավորի կարգավիճակը, ինչպես նաև օգտվելու է դատավորի համար նախատեսված սոցիալական երաշխիքներից, այդ թվում՝ ստանալու է աշխատավարձ։
Արաքս Մամուլյան
