Էրզրումում Թուրքիա-Ադրբեջան գործարար համաժողով է տեղի ունեցել։ Թուրքական լրատվամիջոցների հաղորդմամբ՝ հանդիպմանը մասնակցել են Էրզրումի փոխնահանգապետ Մուստաֆա Բերկ Չելիքը, Կարսում Ադրբեջանի գլխավոր հյուպատոս Զամին Ալիևը, ETSO-ի խորհրդի նախագահ Սաիմ Օզաքալընը, Ադրբեջանի առևտրային ներկայացուցիչ Թամերլան Թաղիևը, Էրզրումի քաղաքապետարանի գլխավոր քարտուղարի տեղակալ Մուրատ Ալթունդաղը, ETSO-ի խորհրդի և ժողովի անդամներ, գործարարներ, ՀԿ-ների ներկայացուցիչներ։
Առևտրաարդյունաբերական պալատի նախագահ Սաիմ Օզաքալընն իր խոսքում անդրադարձել է նաև, այսպես կոչված, «Զանգեզուրի միջանցքին»՝ նշելով, որ Էրզրումը Թուրքիայի արևելքում Կովկասի ռազմավարական դարպաս է։
«Մեր նահանգը գտնվում է ութ տարբեր սահմանային դարպասներից 300 կիլոմետր հեռավորության վրա. այն լոգիստիկ եռագրության կենտրոնում է՝ իր երկաթուղային, մայրուղային և ավիացիոն ենթակառուցվածքներով։ Էրզրումը նաև տեղակայված է Բաքու-Թբիլիսի-Ջեյհան և Արևելյան Անատոլիա բնական գազի խողովակաշարերի վրա, ինչը մեր քաղաքին դնում է էներգետիկ փոխադրման առումով ռազմավարական դիրքում։ «Զանգեզուրի միջանցքը», որը լրացնում է այս տարածաշրջանային ենթակառուցվածքը, կկապի Ադրբեջանի արևմտյան շրջանները Նախիջևանի և Թուրքիայի հետ։ Նախագծի ընդհանուր երկարությունը 215 կիլոմետր է։ «Զանգեզուրի միջանցքի» շահագործման մեկնարկով կանխատեսվում է Թուրքիա-Կենտրոնական Ասիա առևտրի աճ, լոգիստիկ ծախսերի կրճատում, տնտեսական վերածնունդ և զբաղվածության աճ այնպիսի նահանգներում, ինչպիսիք են Էրզրումը, Իգդիրը և Կարսը»,- հայտարարել է նա։
Թարգմանությունը՝ Էմմա Չոբանյանի
