29.04.2026 | 17:07
Ինչպես Մուստաֆաևի գլխավորած պատվիրակությունը հեռացավ Աղվերանից․ ՏԵՍԱՆՅՈՒԹ
Ռուսական զորքերը ԱԹՍ-ներով գրոհել են Խարկովը․ 3 մարդ զոհվել է, 60-ը՝ վիրավորվել
Քաղաքականություն
11.06.2025 | 11:19
Ռուսական զորքերը հունիսի լույս 11-ի գիշերն անօդաչու թռչող սարքերով հարվածել են Խարկովին։ Տեղական իշխանությունների տվյալներով՝ 2 մարդ զոհվել է, 60-ը՝ վիրավորվել, փոխանցում է Current time-ը։
Խարկովի քաղաքապետ Իգոր Տերեխովի տեղեկացմամբ՝ ռուսական զորքերը 17 «Շահեդ» ԱԹՍ-ով հարվածել են Խարկովի երկու շրջաններին՝ Սլոբոդսկոյին և Օսնովյանսկիին։ Պաշտոնյան նշել է, որ հարվածի հետևանքով վիրավորվել է 54 մարդ, այդ թվում՝ հինգ երեխա։ Ավելի ուշ Ուկրաինայի արտակարգ իրավիճակների պետական ծառայությունը հավելել է, որ վիրավորվել է ութ երեխա։
Տերեխովի խոսքով՝ մի քանի մարդու հաջողվել է փրկել հրդեհված տներից։
«Կան ուղիղ հարվածներ բազմահարկ շենքերին, մասնավոր տներին, խաղահրապարակներին, բիզնեսներին և հասարակական տրանսպորտին։ Այրվող բնակարաններ, ավերված տանիքներ, այրված մեքենաներ, կոտրված պատուհաններ»,- գրել է քաղաքապետը։
Վնասվել են նաև տրոլեյբուսներ, կոմունալ և արդյունաբերական օբյեկտներ։ Վնասված տների բնակիչները տարհանվում են, ասվում է Ուկրաինայի արտակարգ իրավիճակների պետական ծառայության հաղորդագրության մեջ։
Ռուսական զորքերը հարվածներ են հասցրել նաև Օդեսայի մարզին։
«Ամառանոցները, օժանդակ շինությունները, մեքենաները և քաղաքացիական ջրային փոխադրամիջոցները վնասվել և ոչնչացվել են։ Հրդեհներ են բռնկվել վայրերում, որոնք արագորեն մարվել են փրկարարների կողմից։ Բարեբախտաբար, ոչ ոք չի տուժել»,- հաղորդում է Ուկրաինայի արտակարգ իրավիճակների պետական ծառայությունը։
Խարկովի շրջանային ռազմական վարչակազմի ղեկավար Օլեգ Սինեգուբովն էլ հայտնել է, որ Խարկովում և շրջանում գիշերային հարձակումների հետևանքով, ընդհանուր առմամբ, տուժել է 65 մարդ։ Նրանցից 60 մարդ, այդ թվում՝ 9 երեխա, վիրավորվել է հենց Խարկովում։ Քաղաքում զոհերի թիվը հասել է 3-ի։
«65-ամյա տղամարդը մահացել է այրվածքային վերակենդանացման բաժանմունքում, որը հոսպիտալացվել էր ծայրահեղ ծանր վիճակում»,- նշել է Օլեգ Սինեգուբովը։
Թարգմանությունը՝ Էմմա Չոբանյանի
